پاکستان میں ذیابیطس کے مریضوں کی تعداد ساڑھے 3 کروڑ سے تجاوز کرگئی

پاکستان میں ذیابیطس کے مریضوں کی تعداد ساڑھے 3 کروڑ سے تجاوز کرچکی ہے جبکہ ماہرینِ طب نے غیر صحت مند طرزِ زندگی کو اس مرض میں تیزی سے اضافے کی بڑی وجہ قرار دیا ہے۔ طبی ماہرین کے مطابق ملک میں 18 سال سے زائد عمر کے 33.5 فیصد یعنی تقریباً ساڑھے 3 کروڑ افراد ذیابیطس کا شکار ہیں۔ حیدرآباد کے حوالے سے انکشاف کیا گیا ہے کہ وہاں ہر 5 میں سے ایک شخص اس عارضے میں مبتلا ہے۔

ماہرین کا کہنا ہے کہ ذیابیطس صرف انسولین کی کمی یا عدم موجودگی تک محدود نہیں بلکہ یہ آنکھوں، گردوں اور دل کی خطرناک بیماریوں کا بھی سبب بنتی ہے۔ دستاویزات اور طبی رپورٹس کے مطابق بڑھتی عمر کے ساتھ باقاعدگی سے شوگر کے ٹیسٹ کروانا انتہائی ضروری ہے۔ ماہرین نے مشورہ دیا ہے کہ روزانہ کم از کم 30 منٹ چہل قدمی کو معمول بنایا جائے، گھر کا پکا ہوا کھانا کھایا جائے اور باہر کے کھانوں سے مکمل اجتناب کیا جائے۔

دوسری جانب وزیراعلیٰ پنجاب مریم نواز شریف نے اپنے ایک بیان میں کہا ہے کہ پاکستان میں ذیابیطس کے مرض کی بڑھتی ہوئی شرح موثر اقدامات کی متقاضی ہے اور اس کا پھیلاؤ انتہائی تشویش کا باعث ہے۔ انہوں نے واضح کیا کہ صحت عوام کا بنیادی حق ہے جسے ہر شہری کی دہلیز تک پہنچایا جا رہا ہے۔ وزیراعلیٰ کے مطابق تاریخ میں پہلی مرتبہ ٹائپ ون ذیابیطس کے شکار بچوں کو انسولین کٹس اور دیگر مریضوں کو لاکھوں میڈیسن باکسز ان کے گھروں تک پہنچائے جا رہے ہیں تاکہ انہیں بہترین طبی سہولیات میسر آسکیں۔