اسلام آباد لا کالج کا پرنسپل بدعنوانی کے الزام میں گرفتار

راولپنڈی: قومی احتساب بیورو (نیب) راولپنڈی نے وفاقی دارالحکومت اسلام آباد میں لا کالج کے پرنسپل عتیق الرحمان کو بدعنوانی کے الزام میں گرفتار کر لیا ہے۔نیب کا کہنا ہے کہ اسلام آباد لا کالج نامی ادارے کے پرنسپل نے اسلامیہ یونیورسٹی بہاولپور سے الحاق کا جھوٹا دعویٰ کیا اور فیسوں کی مد میں عوام سے کروڑوں روپے بٹورے۔

ترجمان نیب کے مطابق ملزم نے 209 طلبہ کو دھوکہ دے کر فیس بٹوری۔ ملزم عتیق الرحمان کو کل بدھ کے روز احتساب عدالت میں پیش کرکے جسمانی ریمانڈ حاصل کیا جائے گا۔ڈائریکٹر جنرل نیب عرفان منگی نے طلبہ کو ہدایت کی ہے کہ کسی بھی تعلیمی ادارے میں داخلے سے قبل ہائرایجوکیشن کمیشن (ایچ ای سی) سے رجسٹریشن ضرور چیک کریں۔