چین کا پاکستان سے گوادر حملے کی مکمل تحقیقات کا مطالبہ

اسلام آباد:پاکستان میں چینی سفارتخانے نے گوادر ایکسپریس وے پروجیکٹ پر چینی قافلے پر خودکش حملے کی شدید مذمت کی ہے اور حملے کی مکمل تحقیقات اور قصورواروں کو سخت سے سخت سزائیں دینے کا مطالبہ کیا ہے۔

چینی سفارت خانے کا کہنا ہے کہ اس حملے کے بعد انھوں نے فوری طور پر ہنگامی پلان نافذ کرتے ہوئے پاکستان سے مطالبہ کیا کہ وہ زخمیوں کا مناسب علاج کرنے کے ساتھ ساتھ حملے کی مکمل تحقیقات اور قصورواروں کو سخت سے سخت سزائیں دے۔

سفارت خانے کی جانب سے جاری کردہ اعلامیہ کے مطابق ’پاکستان میں تمام متعلقہ محکموں سے چینی شہریوں کی سیکیورٹی کو مزید بہتر بنانے کے اقدامات میں تیزی اور سیکیورٹی کے معاملے میں شراکت داری کو یقینی بنانے کا مطالبہ کیا گیا ہے تاکہ آئندہ اس طرح کے واقعات سے بچا جا سکے۔