کورونا نے پھر خطرے کی گھنٹی بجا دی۔مزید 126 افراد جاں بحق

ملک بھر میں کورونا وائرس نے ایک بار پھر خطرے کی گھنٹی بجا دی ، گزشتہ 24 گھنٹوں میں وائرس کے باعث 126 افراد جاں بحق ہوئے جبکہ چار ہزار 199 کیسز رپورٹ ہوئے ۔

نیشنل کمانڈ اینڈ آپریشن سینٹر( این سی او سی) کے مطابق پاکستان میں کورونا سے متاثر ہونے والوں کی مجموعی تعداد 11 لاکھ 35 ہزار 858 ہو گئی ، مہلک وائرس سے 25 ہزار 220 افراد جاں بحق ہوئے جبکہ 10 لاکھ 19 ہزار 434 افراد نے مہلک وائرس کو شکست دی ، ملک بھر میں 25 ہزار 220 ایکٹو کورونا کیسز ہیں ۔

این سی او سی کے جاری کردہ اعداد و شمارکے مطابق سندھ کورونا سے متاثر سب سے بڑا صوبہ ہے جہاں  4 لاکھ 24 ہزار 139 افراد میں کورونا کی تصدیق ہوئی ، تین لاکھ 68 ہزار 724 افراد نے مہلک وائرس کو شکست دی جبکہ چھ ہزار 698 افراد مہلک وائرس کی بھینٹ چڑھے ۔ سندھ میں 48 ہزار 717 افراد اب بھی زیرعلاج ہیں ۔

پنجاب کورونا سے متاثر دوسرا بڑا صوبہ ہے ، پنجاب میں تین لاکھ 83 ہزار 742 افراد میں مہلک وائرس کی تشخیص ہوئی ، 11 ہزار 633 افراد جاں بحق ہوئے جبکہ تین لاکھ 47 ہزار 698 افراد ریکور ہوئے ، 24 ہزار 411 افراد افراد اب بھی زیر علاج ہیں ۔

خیبرپختونخوا کورونا سے متاثرہ تیسرا بڑا صوبہ ہے  جہاں ایک لاکھ 58 ہزار 243 افراد میں کورونا وائرس پایا گیا ، ایک لاکھ 45 ہزار 804 افرادعلاج معالجہ کے بعد صحتیاب ہوئے جبکہ چار ہزار 839 افراد جاں بحق ہوئے ، کے پی میں سات ہزار600 مریض زیرعلاج ہیں۔

وفاقی دارالحکومت اسلام آباد میں 96 ہزار980 افراد کورونا سے متاثر ہوئے ، 855 افراد  جاں بحق ہوئے جبکہ پانچ ہزار 630 اب بھی زیر علاج ہیں ۔

گلگت بلتستان میں نو ہزار 739 کورونا کیسز پائے گئے ، 171 افراد جاں بحق ہوئے جبکہ نو ہزار 67 افراد نے وائرس کو شکست دی ، گلگت میں 501 افراد  کورونا کے مرض میں مبتلا ہیں ۔

بلوچستان میں 31 ہزار 928 افراد میں مہلک وائرس کی تشخیص ہوئی ، 338 اموات ہوئیں جبکہ 31 ہزار 84 افراد روبصحت ہوئے ، بلوچستان میں کورونا کے 506 ایکٹو کیسز ہیں ۔

آزاد جموں وکشمیر میں اب تک کورونا کے 31 ہزار 87 کیسز سامنے آئے ہیں ، 686 اموات ہوئیں ، تین ہزار 839 افراد مختلف ہسپتالوں میں زیر علاج ہیں ۔