2سے5جولائی کے دوران کراچی میں گرج چمک کے ساتھ بارش کاامکان

کراچی:محکمہ موسمیات نے پیش گوئی کرتے ہوئے کہاہے کہ کراچی میں یکم جولائی تک موسم جزوی ابر آلود ، صبح و رات میں بوندا باندی ہو گی جبکہ درجہ حرارت 33 سے 35 سینٹی گریڈ رہے گا ۔

محکمہ موسمیات کا کہناتھا کہ 2سے5جولائی کے دوران کراچی میں آندھی اورگرج چمک کے ساتھ بارش متوقع ہے ، بحیرہ عرب، خلیج بنگال سے نم ہوائیں 2جولائی کو مشرقی سندھ میں داخل ہوں گی ،عمرکوٹ، ٹھٹھہ ، بدین اوردادو میں اربن فلڈنگ کا خدشہ ہے ، 3 سے 5 جولائی کے درمیان سمندر میں طغیانی رہے گی ۔

محکمہ موسمیات نے بیان جاری کرتے ہوئے کہا کہ نواب شاہ ، سکھر،لاڑکانہ ، شکار پورمیں چند مقامات پر بارش کا امکان ہے جبکہ تھر پارکر،عمر کوٹ، سانگھڑ، بدین، میر پورخاص اورحیدرآباد میں آندھی کے ساتھ بارش ہو سکتی ہے ، کہیں کہیں موسلا دھار بارش کا بھی امکان ہے ۔