امریکہ میں بگولوں سے تباہی، گھر تنکوں کی طرح اڑا دیئے

واشنگٹن (امت نیوز) امریکا میں گزشتہ روز آئے طوفانی بگولوں نے تباہی مچا دی جس سے گھر تنکوں کی طرح اڑتے دکھائی دیئے۔ جبکہ درخت بھی جڑوں سے اکھڑ گئے، 6 اموات کی ابتدائی اطلاعات موصول ہوئی ہیں۔

غیر ملکی میڈیا کے مطابق امریکی ریاست الاباما کے شہر سلیما میں بگولے کے طاقتور طوفان نے زیادہ تباہی مچائی۔ یہ طوفان اتنا شدید تھا جہاں سے گزرا تباہی کی ایک داستان رقم کرتا گیا۔ درخت جڑوں سے اکھڑے تو گھروں کی چھتیں اڑ گئیں۔ درجنوں مکانات طوفان کی تاب نہ لاتے ہوئے گر گئے، جب کہ اس طوفان کی زد میں آکر کم از کم 6 افراد بھی ہلاک ہونے کی اطلاعات ہیں۔

طوفان سے بدترین تباہی کا شکار ہونے والا شہر سلیما شہری حقوق کی تحریک کے حوالے سے ایک تاریخی شہر ہے جس کی آبادی 18 ہزار کے لگ بھگ ہے اور یہ ریاست الاباما کے دارالحکومت منٹگمری سے 80 کلومیٹر مغرب کی جانب واقع ہے۔ بگولے کا طوفان گزرنے کے بعد سوشل میڈیا پر اس سے ہونے والی تباہی کی ویڈیوز گردش کر رہی ہیں جس میں طوفان کے بعد شہر اجڑنے کی ساری کہانی نظر آ رہی ہے۔ شہر میں جابجا درخت جڑوں سے اکھڑ گئے تھے، بجلی کے کھمبے سڑکوں پر پڑے تھے۔

سڑکوں کو بڑی دراڑیں پڑی ہوئی ہیں۔ ایک عمارت میں آگ بھی لگی دکھائی دے رہی ہے جس کے شعلے اور دھواں آسمان کی جانب بلند ہو رہا ہے۔ تاہم یہ معلوم نہ ہوسکا کہ عمارت میں آگ طوفان کے باعث لگی یا کوئی اور وجہ تھی۔ حکام نے بتایا کہ وسطی الاباما میں طوفان کی وجہ سے 6 افراد ہلاک ہو ئے ہیں۔ اوٹاگا کاؤنٹی، الاباما میں ایمرجنسی مینجمنٹ ڈائریکٹر ایرنی بیگیٹ نے بتایا کہ وہ اس بات کی تصدیق کر سکتے ہیں کہ اولڈ کنگسٹن کمیونٹی کے متعدد گھروں میں چھ ہلاکتیں ہوئی ہیں اور 12 افراد شدید زخمی ہوئے ہیں جنہیں اسپتال منتقل کردیا گیا ہے۔

ایرنی بیگیٹ نے مزید بتایا کہ حکام کا اندازہ ہے کہ طوفان سے 40 سے 50 گھروں کو نقصان پہنچا یا وہ تباہ ہو گئے ہیں۔ طوفان سے موبائل اور روایتی گھر دونوں کو نقصان پہنچا ہے۔