دارالعلوم کراچی کے قریب فائرنگ سے مچھلی فروش جاں بحق

کراچی (اسٹاف رپورٹر) کورنگی دارالعلوم کے قریب فائرنگ سے ایک شخص جاں بحق جبکہ چاکیواڑہ میں فائرنگ کے واقعہ میں ایک شخص زخمی ہوگیا ۔ تفصیلات کے مطابق کورنگی دارالعلوم کے ایریا میں نامعلوم ملزمان کی فائرنگ سے ایک شخص جاں بحق ہوگیا جس کی لاش جناح اسپتال لائی گئی ۔

اس حوالے سے ایس ایچ او عوامی کالونی فراست علی شاہ نے بتایا کہ مقتول کی شناخت 40 سالہ نورالامین کے نام سے کی گئی جس وقت فائرنگ کا واقعہ پیش آیا مقتول کے ہمراہ اس کا کمسن بیٹا بھی موٹر سائیکل پر سوار تھا ، مقتول مچھلی کا کاروبار اور لیاری کا رہائشی تھا جو کہ اپنے سسرال آیا ہوا تھا اور وہاں سے واپس جاتے ہوئے فائرنگ کا نشانہ بنا دیا گیا ، مقتول کو سر پر ایک گولی لگی تھی جبکہ ابتدائی تحقیقات کے مطابق مقتول کا اپنے سسرالیوں سے جھگڑا بھی چل رہا تھا تاہم پولیس تمام پہلوؤں پر تحقیقات کر رہی ہے ۔

پولیس کا کہنا ہے کہ مقتول سے کوئی لوٹ مار کی واردات نہیں ہوئی ہے دریں اثنا چاکیواڑہ کے علاقے بکرا پیڑی ٹریفک پولیس چوکی کے قریب فائرنگ کے واقعہ میں 65 سالہ محمد اکرم زخمی ہوگیا جسے فوری طبی امداد کے لیے سول اسپتال لیجایا گیا ، پولیس کا کہنا ہے کہ ابتدائی تحقیقات کے مطابق واقعہ جھگڑے کے دوران پیش آیا ہے اور اس حوالے سے مزید تحقیقات کی جا رہی ہے ۔