ایران کی یونیورسٹی میں احتجاجاً کپڑے اتارنے والی لڑکی گرفتار

یونیورسٹی کے حکام اور میڈیا کا ردعمل

آزاد یونیورسٹی کے تعلقات عامہ اور تقاریب کے ڈائریکٹر عامر محجوب نے سوشل میڈیا ایکس پر ایک پوسٹ میں لڑکی کی یونیورسٹی کی سکیورٹی سے جھگڑے کی تردید کی ہے اور انھوں نے لڑکی کو یونیورسٹی کی طالبہ کہا ہے۔ مسٹر محجوب کا کہنا ہے کہ لڑکی کی گرفتاری کے بعد وہ خود تھانے پہنچے اور ’ایمرجنسی ڈیپارٹمنٹ کی تصدیق کے مطابق اس کی جسمانی حالت کافی درست بتائی گئی ہے۔‘

’تحقیقات سے پتہ چلتا ہے کہ ذہنی خرابی کی وجہ سے وہ اپنے ہم جماعت اور اپنے استاد کی فلم بندی کرنا شروع کر دیتی ہے، جس پر اسے اعتراض کا سامنا کرنا پڑتا ہے۔ یہ ایک ایسا معاملہ ہے جس کی نظیر نہیں ملتی ہے۔

طلبا اور سیکیورٹی کی طرف سے خبردار کیے جانے کے بعد وہ صحن کی طرف نکل جاتی ہے اور پھر بے حیائی کا ارتکاب کرتی ہے۔ اس مخصوص معاملے میں جو کچھ ہوا اس سے ظاہر ہوتا ہے کہ طالبہ کا حیا کے خلاف عمل غلط ہے اور اس کے پس پشت حجاب کے نوٹس کا عمل دخل نہیں ہے۔ اس نے طالب علم کی اجازت کے بغیر فلم بندی اور فوٹو گرافی کی جو کہ سکیورٹی، طلبا اور پروفیسرز کی رازداری کی خلاف ورزی ہے۔‘

ایرانی خبررساں ادارے آئی ایس این اے سمیت ایرانی میڈیا نے یہ بھی اطلاع دی ہے کہ اس ’طالبہ‘ کو طلباء کی فلم بندی کرنے کے بعد ان کے احتجاج کا سامنا کرنا پڑا اور ان کے احتجاج کے جواب میں اس نے اپنے کپڑے اتار دیے۔

آزاد یونیورسٹی کے حوالے سے بعض ذرائع ابلاغ میں کہا گیا ہے کہ ’یہ طالبہ شدید ذہنی دباؤ اور ذہنی عارضے کا شکار ہے اور اسے طبی مرکز منتقل کر دیا گیا ہے۔