حضرت عیسیٰ کی تصویر سے مخاطب ہو کر بال کٹوانے کا مشورہ دینے پر ٹک ٹاکر کو3 سال قید

جکارتا: انڈونیشیا میں ایک ٹک ٹاکر کو مبینہ طور پر اپنے فون پر حضرت عیسیٰ کی تصویر سے ’بات کرنے‘ اور انھیں بال کٹوانے کی ترغیب دینے پر تقریباً 3 سال قید کی سزا سنائی گئی ہے۔

رتو تھیلیسا مسلم ٹرانسجینڈر خاتون ہیں، جن کے ٹک ٹاک پر چار لاکھ 42 ہزار سے زیادہ فالوورز ہیں۔

انھوں نے یہ حرکت اس وقت کی جب وہ لائیو سٹریم پر تھیں اور اس تبصرے کا جواب دے رہی تھیں جس میں ان سے کہا گیا تھا کہ وہ ایک مرد کی طرح نظر آنے کے لیے اپنے بال کٹوا لیں۔

پیر کو سماٹرا کی ایک عدالت نے تھیلیسا کو ایک متنازعہ آن لائن نفرت انگیز بیان کے قانون کے تحت نفرت پھیلانے کا مجرم قرار دیا اور دو سال اور 10 ماہ قید کی سزا سنا دی۔