ایران نے روس سے حمایت مانگ لی

تہران: ایران کے وزیر خارجہ عباس عراقچی روس پہنچ چکے ہیں جہاں ان کی روسی صدر پیوٹن سے ملاقات ہوئی اور اس حوالے سے خبر رساں ایجنسی کا دعویٰ ہے کہ ایرانی سپریم لیڈ رنے انہیں روسی صدر کیلئے ایک خط دیاہے جس میں روس کی حمایت کی درخواست کی گئی ہے ۔

ایرانی ذرائع نے رائٹرز کو بتایا کہ ایران کو تاحال روس کی حمایت سے زیادہ کوئی خاص فائدہ نہیں ہوا، اور تہران چاہتا ہے کہ پیوٹن امریکہ اور اسرائیل کے خلاف زیادہ مضبوطی سے اس کا ساتھ دے۔ تاہم، ذرائع نے یہ وضاحت نہیں کی کہ ایران کس نوعیت کی مدد چاہتا ہے۔

روس کی سرکاری خبر رساں ایجنسی تاس کے مطابق، عباس عراقچی نے کہا کہ ایران اور روس مشرق وسطیٰ میں حالیہ کشیدگی پر اپنے مؤقف کو ہم آہنگ کر رہے ہیں۔پیوٹن متعدد بار ایران اور امریکہ کے درمیان ثالثی کی پیشکش کر چکے ہیں اور کہا ہے کہ ماسکو نے تنازع کے حل کے لیے اپنے خیالات دونوں فریقین تک پہنچا دیے ہیں، جبکہ ایران کے پرامن جوہری توانائی تک رسائی کو بھی یقینی بنایا جائے گا۔

پیوٹن نے مزید کہا کہ اسرائیل نے ماسکو کو یہ یقین دہانی کروائی ہے کہ ایران کے شہر بوشہر میں جوہری پاور پلانٹ پر کام کرنے والے روسی ماہرین اسرائیلی فضائی حملوں سے محفوظ رہیں گے۔