ایران : جاسوسی کے الزام میں یورپی باشندہ گرفتار

تہران: ایران نے فوجی مقامات کی جاسوسی کے الزام میں یورپی باشندے کو گرفتار کر لیا۔

ایران کی فارس نیوز ایجنسی کی رپورٹ کے مطابق ایک یورپی شہری کو ایرانی حکام نے جنوبی ایرانی صوبے ہرمزگان میں گرفتار کر لیا۔ رپورٹ کے مطابق گرفتار شخص پر”حساس اور فوجی علاقوں کی جاسوسی” کا الزام تھا۔

اس سے قبل آج ایران کے سرکاری میڈیا نے اطلاع دی ہے کہ مغربی صوبہ ہمدان میں اسرائیل کی خفیہ ایجنسی موساد کے لیے مبینہ طور پر جاسوسی کے الزام میں مزید 6 افراد کو گرفتار کیا گیا ہے۔

واضع رہے اسرائیل کے ساتھ تنازع شروع ہونے کے بعد سے ایران درجنوں افراد کو گرفتار کر چکا ہے، اسرائیل کے لیے جاسوسی کے الزام میں متعدد افراد کو پھانسی دے چکا ہے۔