کار سوار نےگاڑی اسرائیلی فوجیوں پر چڑھادی، 8 زخمی

تل ابیب:  وسطی اسرائیل کے شہر نیتانیا کے قریب  کار سوار نے بس اسٹاپ پر کھڑے  اسرائیلی فوجیوں پر گاڑی چڑھا دی جس کے نتیجے میں 8 اسرائیلی فوجی زخمی ہوگئے۔

اسرائیلی فوج کی جانب سے بھی تصدیق کی گئی ہے کہ زخمی ہونے والے تمام 8 افراد اسرائیلی فوجی ہیں۔پولیس کے مطابق ڈرائیور موقع سے فرار ہو کر گاڑی چھوڑ گیا جس کی تلاش کے لیے سرچ آپریشن جاری ہے۔

پولیس کا کہنا ہے کہ حملہ آور گاڑی کو بیت لید کے علاقے میں چھوڑ کرفرار ہوگیا، پولیس اور شن بیت سکیورٹی ایجنسی کے مطابق گاڑی کا مالک ایک اسرائیلی شہری ہے، تاہم حکام کی جانب سے گاڑی چوری شدہ ہونے کا امکان بھی ظاہر کیا گیا ہے۔

دوسری جانب فلسطینی مزاحمتی تنظیم حماس کی جانب سے اس واقعے کو فلسطینیوں کے خلاف اسرائیلی جرائم کا فطری ردعمل قرار دیا گیا ہے۔