غزہ میں بھوک اور تکلیف دل دہلا دینے والی ہے، امریکی سینیٹر کوری بُکر

 

سینیٹر کوری بُکر نے ایکس (سابقہ ٹوئٹر) پر پوسٹ کرتے ہوئے کہا کہ غزہ میں اشد ضروری خوراک، پانی اور ادویات فوری طور پر پہنچانے کی ضرورت ہے تاکہ شدید غذائی قلت کا شکار افراد کی جانیں بچائی جا سکیں۔

انہوں نے کہا کہ یہ ہماری اجتماعی اخلاقی ذمہ داری ہے کہ امداد ان لوگوں تک پہنچے جنہیں اس کی فوری ضرورت ہے۔

کوری بُکر نے امریکی اور اسرائیلی حمایت یافتہ غزہ ہیومینٹیرین فاؤنڈیشن (GHF) کو بھی تنقید کا نشانہ بنایا اور کہا کہ ان کی حکمتِ عملی مؤثر ثابت نہیں ہو سکی۔

انہوں نے اس تاثر کو بھی مسترد کیا کہ امداد حماس کے ہاتھوں میں جا رہی ہے، اور کہا کہ نیویارک ٹائمز نے حالیہ رپورٹ میں بتایا ہے کہ اسرائیلی فوج کو کبھی کوئی ایسا ثبوت نہیں ملا۔

امریکی سینیٹر نے خبردار کیا کہ امداد میں تاخیر ہر لمحہ قیمتی انسانی جانوں کے ضیاع کا باعث بنے گی اور بچوں، حاملہ خواتین اور دیگر شہریوں کی صحت کو ناقابلِ تلافی نقصان پہنچے گا۔ انہوں نے عالمی برادری سے فوری عملی اقدامات کا مطالبہ کیا ہے۔