افغانستان میں زلزلے سے 1,411 سے زائد اموات، 8000 گھر تباہ

پشاور: افغان نیشنل ڈیزاسٹر مینجمنٹ اتھارٹی نے بتایا کہ ابتدائی معلومات کے مطابق اب تک زلزلے سے 1,411 افراد جاں بحق ہو چکے ہیں جبکہ 3,124 زخمی ہیں۔

افغان ہلال احمرنے بتایا کہ افغانستان میں زلزلے سے 8 ہزار گھر تباہ ہوئے ہیں جبکہ 1124 لاشیں مل چکی ہیں۔

زلزلے سے کم از کم پانچ صوبوں میں اموات ہوئی ہیں اور بڑے پیمانے پر نقصان ہوا ہے۔ شام گئے تک ریسکیو اہلکار تباہ شدہ گھروں سے لوگوں کو نکال رہے تھے اور زخمیوں کو ہیلی کاپٹر کے ذریعے منتقل کر رہے تھے۔

مشرقی صوبہ کنڑ میں آفات سے نمٹنے کے محکمے کے سربراہ احسان اللہ احسان نے بتایا کہ ریسکیو آپریشن اب بھی جاری ہے، بہت سے لوگ اپنی چھتوں کے ملبے کے نیچے دبے ہوئے ہیں، مرنے والوں کی تعداد میں اضافہ ہو سکتا ہے۔

پاکستان کے وزیراعظم شہباز شریف نے افغانستان میں زلزلے سے سینکڑوں اموات پر اظہار افسوس کرتے ہوئے کہا ہے کہ ہم افغان بھائیوں اور بہنوں کے ساتھ کھڑے ہیں اور اس سلسلے میں ہر ممکن تعاون دینے کے لیے تیار ہیں۔

ایکس پر شیئر کیے گئے پیغام میں ان کا کہنا تھا کہ اس غم کی گھڑی میں ہماری ہمدردیاں متاثرہ افراد اور ان کے اہل خانہ کے ساتھ ہیں، پاکستان کے عوام اور حکومت کی جانب سے میں سوگوار خاندانوں کے لیے دلی تعزیت اور دعاؤں کا اظہار کرتا ہوں۔

اقوام متحدہ کی مائیگریشن ایجنسی نے خبردار کیا کہ کنڑ کے دور دراز صوبوں میں واقع کچھ شدید متاثرہ دیہات سڑکوں کی بندش کی وجہ سے ناقابل رسائی ہیں۔

صوبے ننگرہار اور کنڑ پاکستان کی سرحد سے ملتے ہیں جہاں طورخم کراسنگ دونوں ممالک کے درمیان زمینی آمد و رفت کا اہم مرکز ہے۔

اقوامِ متحدہ کے سیکریٹری جنرل انتونیو گوتریش نے زلزلے سے ہونے والے جانی نقصان پر افسوس کا اظہار کیا۔

پوپ لیو نے کہا کہ وہ مشرقی افغانستان میں زلزلے کے باعث ہونے والے جانی نقصان پر رنجیدہ ہیں۔

یاد رہے کہ پاکستان میں زلزلہ وفاقی دارالحکومت اسلام آباد، اردگرد کے علاقوں اور خیبر پختونخوا کے کئی اضلاع میں محسوس کیا گیا، زلزلہ رات 2 بج کر 18 منٹ پر آیا اور اس کا مرکز جنوب مشرقی افغانستان میں تھا۔

پشاور، مردان، مری اور ملحقہ علاقوں میں بھی شدید جھٹکے محسوس کیے گئے جس سے لوگ خوف و ہراس کے عالم میں گھروں سے باہر نکل آئے، اسی طرح کی اطلاعات چکوال، ٹیکسلا، واہ کینٹ اور لاہور سے بھی موصول ہوئیں۔

بعض اطلاعات کے مطابق زلزلے کے جھٹکے انڈیا ے کچھ حصوں میں بھی محسوس کیے گئے۔

کابل انتظامیہ کے مطابق افغانستان میں زلزلہ پاکستان کے صوبہ خیبر پختونخوا سے متصل مشرقی صوبے کنڑ میں سب سے زیادہ محسوس ہوا۔

کابل انتظامیہ کی رپورٹ کے مطابق صوبہ کنڑ میں چوکی کے یوہ گل اور نورگل کے مزار درہ جانے والی سڑکیں پہاڑی تودے گرنے کے باعث بند ہو گئی ہیں، جس سے امدادی کارروائیاں متاثر ہو رہی ہیں۔

بعض اطلاعات کے مطابق زلزلے کے جھٹکے وقفے وقفے سے اب بھی محسوس ہو رہے ہیں۔

برطانیہ کا 10 لاکھ پاؤنڈ ، افغان سرمایہ کار کا متاثرین  کیلیے 50 کروڑ افغانی روپے کی امداد کا اعلان

افغانستان میں آنیوالے تباہ کن زلزلے کے بعد امدادی کارروائیاں جاری ہیں۔برطانیہ نے   ایک دس لاکھ پاونڈ کی ہنگامی مالی امداد کا اعلان کیاہے جبکہ افغان سرمایہ کار اور عزیزی بینک کے مالک میرویس عزیزی نے مشرقی افغانستان میں آنے والے زلزلے پر تعزیت کا اظہار کرتے ہوئے متاثرین کے لئے  50 کروڑ افغانی روپے عطیہ کرنے کا اعلان کیا ہے۔
برطانوی نشریاتی ادارے کے مطابق انھوں نے ایکس پر اپنے پیغام میں کہا کہ میں نے عزیزی فانڈیشن کے اپنے ساتھیوں کو ہدایت کی ہے کہ وہ جلد از جلد متاثرہ علاقوں کا دورہ کریں اور ان کی ضروریات کا جائزہ لیں اور امداد کی تقسیم کا عمل جلد از جلد شروع کریں۔افغانستان میں اتوار کی  رات  آنے والے قیامت خیز زلزلے اور اس کے نتیجے میں ہونے والی تباہی کے بعد سے بین الاقوامی اداروں اور ممالک کی جانب سے امداد کے اعلانات سامنے آرہے ہیں۔
واضح رہے کہ افغانستان میں آنے والے چھ اعشاریہ صفر شدت کے زلزلے کے بعد بین الاقوامی امداری اداروں اور مقامی انتظامیہ کی جانب سے کہا جا رہا ہے ہلاکتوں میں اضافے کا خدشہ ہے تاہم اب تک 800 افراد کی ہلاکت کی تصدیق کی گئی ہے۔برطانوی دفتر خارجہ نے مشرقی افغانستان میں زلزلے کے متاثرین  کیلئے   دس لاکھ پاونڈ کی ہنگامی مالی امداد کا اعلان کیا ہے۔

برطانوی  وزارت خارجہ نے ایک بیان میں کہا ہے کہ یہ رقم اقوام متحدہ کے پاپولیشن فنڈ (یو این ایف پی اے)  اور انٹرنیشنل فیڈریشن آف ریڈ کراس(آئی ایف آر سی) کے ذریعے سب سے زیادہ متاثرہ علاقوں کی بحالی کے لیے خرچ کی جائے گی۔

برطانوی وزیر خارجہ ڈیوڈ لیمی نے ایک بیان میں کہا کہ اس ہنگامی امداد سے ہمارے شراکت داروں کو سب سے زیادہ متاثرہ افراد کو صحت کی خدمات اور ہنگامی سامان کی فراہمی میں مدد ملے گی۔دوسری جانب سوئٹزرلینڈ حکومت کی جانب سے جاری ہونے والے ایک بیان میں کہا گیا ہے کہ وہ مشرقی افغانستان میں زلزلے کے متاثرین کو امداد فراہم کرنے کی تیاری کر رہا ہے ۔

سوئس وزارت خارجہ نے اپنی ویب سائٹ پر لکھا ہے کہ وہ کابل میں اپنے انسانی امداد اور تعاون کے دفتر کے ذریعے زلزلے سے متاثرہ علاقوں میں اپنے شراکت داروں کی مدد کرے گا۔ سوئٹزرلینڈ نے واقعے کے متاثرین سے اظہار تعزیت کیا ہے۔