نائیجیریا میں کشتی حادثہ، 60 افراد جاں بحق، متعدد لاپتا

 

نائیجیریا کی شمالی وسطی ریاست نائیجرمیں کشتی حادثے کے نتیجے میں کم از کم 60 افراد ہلاک اور 10 شدید زخمی ہو گئے جبکہ متعدد تاحال لاپتا ہیں۔

یہ حادثہ اس وقت پیش آیا جب ضلع ملالےکے گاؤں سے لوگ ایک تعزیتی تقریب میں شرکت کے لیے جا رہے تھے۔ راستے میں ضلع بورگو کے قریب کشتی دریا میں موجود درخت کے تنے سے ٹکرا کر الٹ گئی۔ مقامی حکام کے مطابق حادثہ منگل کی صبح پیش آیا۔

مقامی انتظامیہ کے سربراہ عبداللہ بابا آرا نے بتایا کہ اب تک 60 اموات کی تصدیق ہو چکی ہے جبکہ مزید افراد کے لاپتا ہونے کے سبب ہلاکتوں میں اضافہ ہو سکتا ہے۔

کشتی میں 100 سے زیادہ مسافر سوار تھے۔ 31 لاشیں دریا سے نکالی گئیں جبکہ کشتی کو بھی ریسکیو ٹیموں نے باہر نکال لیا۔ ہلاک شدگان میں زیادہ تر خواتین اور بچے شامل ہیں۔

ریاستی ایمرجنسی مینجمنٹ ایجنسی نے بتایا کہ حادثے کی ایک وجہ کشتی میں ضرورت سے زیادہ مسافروں کا سوار ہونا تھا۔ برسات کے موسم میں نائیجیریا میں کشتیوں کے الٹنے کے واقعات عام ہیں، جس کی بنیادی وجوہات حفاظتی اصولوں کی خلاف ورزی اور پرانی کشتیوں کا استعمال ہیں۔