پُرتشدد مظاہرے، نیپال کے وزیراعظم کے پی شرما اولی مستعفی

کٹھمنڈو: نیپال کے وزیراعظم کے پی شرما اولی نے پرتشدد ہنگاموں کے بعد اپنے عہدے سے استعفیٰ دے دیا۔ 

ان کے معاون پرکاش سلول نے خبر کی تصدیق کرتے ہوئے بتایا کہ وزیرِاعظم کے استعفے کے بعد ملک ایک نئی سیاسی غیر یقینی صورتحال سے دوچار ہوگیا ہے۔

نیپال کے دارالحکومت کٹھمنڈو میں پرتشدد مظاہرے جاری ہیں، مظاہرین نے نیپال کے سابق وزیرِ اعظم شیر بہادر اور ان کے اہلِخانہ کو بھی تشدد کانشانہ بنایا ہے۔

مظاہرین نے نیپال کے مستعفی وزیرِ اعظم کے پی شرما اولی کے نجی گھر اور پارلیمنٹ کی عمارت کو آگ لگا دی، عمارت کا مرکزی دروازہ بھی جلا دیا گیا۔مظاہرین کی جانب سے نیپال کے وزیرِ خزانہ پر بھی شدید تشدد کیا گیا۔

کشیدگی کے باعث دارالحکومت کٹھمنڈو اور دیگر شہروں میں کرفیو لگادیا گیا تھا۔ مظاہرین نے کرفیو کی خلاف ورزی کرتے ہوئے نیپالی کانگریس کے مرکزی دفتر اور کئی نامور سیاستدانوں کی رہائش گاہوں پر دھاوا بولا۔ 

اولی نے استعفے سے قبل تمام سیاسی جماعتوں کا اجلاس بلایا تھا اور کہا تھا کہ تشدد کسی کے بھی مفاد میں نہیں، مسائل کا حل صرف پُرامن مذاکرات سے ہی ممکن ہے۔

ادھر نیپال سول ایوی ایشن اتھارٹی نے ملک بھر میں ہنگامی صورتحال کے باعث کٹھمنڈو انٹرنیشنل ایئرپورٹ کو فوری طور پر بند کر دیا ہے۔