ٹرمپ کو قطر پر حملے سے ڈھائی گھنٹے پہلے آگاہ کیا تھا،اسرائیلی حکام

امریکی خبر رساں ادارے ایکسيوسکے مطابق اسرائیلی حکام نے دعویٰ کیا ہے کہ وزیراعظم نیتن یاہو نے ڈونلڈ ٹرمپ کو قطر پر حملے سے ڈھائی گھنٹے پہلے آگاہ کیا تھا اور اگر واشنگٹن مخالفت کرتا تو کارروائی روک دی جاتی۔

تاہم ٹرمپ اور امریکی حکام نے اس دعوے کو سختی سے مسترد کر دیا۔ ٹرمپ کے مطابق انہیں حملے کی اطلاع صرف عوامی ذرائع سے ملی، جب کہ امریکی حکام کا کہنا ہے کہ خبر اُس وقت ملی جب اسرائیلی طیارے روانہ ہو چکے تھے اور میزائل فضا میں تھے۔

چند روز قبل اسرائیل نے دوحہ میں حماس رہنماؤں کو نشانہ بنایا تھا، جس میں 5 حماس ارکان اور ایک قطری سکیورٹی اہلکار ہلاک ہوئے۔ حماس کا کہنا ہے کہ اُن کے مرکزی رہنما کارروائی سے کچھ دیر پہلے ہی عمارت چھوڑ گئے تھے، اس لیے وہ محفوظ رہے۔

تجزیہ کاروں کے مطابق یہ حملہ نہ صرف امریکا اور اسرائیل کے تعلقات پر اثر ڈال رہا ہے بلکہ قطر اور واشنگٹن کے روابط کو بھی متاثر کر رہا ہے، جس سے خطے میں اسرائیل کی تنہائی مزید بڑھ سکتی ہے۔