بگرام ایئر بیس واپس لینے کےامریکی صدر کے بیان پرافغان حکومت کا ردعمل

افغان طالبان نے امریکی صدر ڈونلڈ ٹرمپ کے بگرام ایئربیس حوالے کرنے سے متعلق نئے بیان پر اپنا ردعمل دیتے ہوئے کہا ہے کہ دوحہ معاہدے کے تحت امریکہ افغانستان کے خلاف طاقت کا استعمال یا اسے دھمکی نہیں دے سکتا اور یہ کہ امریکہ افغانستان کے اندرونی معاملات میں مداخلت نہ کرنے کا پابند ہے۔

ایکس پر جاری بیان میں افغان طالبان نے کہا ہے کہ ’اسلامی اصولوں کے مطابق اور اپنی متوازن اور معیشت پر مبنی خارجہ پالیسی پر مبنی امارت اسلامیہ افغانستان باہمی اور مشترکہ مفادات کی بنیاد پر تمام ریاستوں کے ساتھ تعمیری تعلقات کی خواہاں ہے۔‘

بیان میں مزید کہا گیا ہے کہ ’تمام دوطرفہ مذاکرات میں امریکہ کو مسلسل آگاہ کیا گیا ہے کہ امارت اسلامیہ کے لیے افغانستان کی آزادی اور علاقائی سالمیت انتہائی اہمیت کی حامل ہے۔‘