امریکی صدر ڈونلڈ ٹرمپ اسرائیل پہنچ گئے

تل ابیب: امریکی صدر ڈونلڈ ٹرمپ اسرائیل پہنچ گئے ہیں جہاں انہیں ملک کا اعلیٰ ترین شہری اعزاز "اسرائیلی صدارتی میڈل آف آنر” دیا جائے گا۔ اسرائیلی صدر آئزک ہرزوگ نے کہا کہ یہ اعزاز صدر ٹرمپ کو غزہ سے یرغمالیوں کی رہائی، جنگ بندی کے قیام، اور مشرق وسطیٰ میں امن کے نئے دور کے قیام میں کردار ادا کرنے پر دیا جا رہا ہے۔

صدر ٹرمپ کے ہمراہ داماد جیرڈ کشنر، بیٹی ایوانکا اور مشرق وسطیٰ کے لیے امریکی خصوصی نمائندہ اسٹیو وٹکوف بھی موجود ہیں۔ بن گورین ایئرپورٹ پر اسرائیلی صدر آئزک ہرزوگ اور وزیراعظم نیتن یاہو نے صدر ٹرمپ کا شاندار استقبال کیا۔

صدر ٹرمپ آج اسرائیلی پارلیمنٹ "کنیسٹ” سے خطاب کریں گے اور یرغمالیوں کے اہل خانہ سے ملاقات بھی کریں گے۔ اس کے بعد وہ مصر میں ہونے والے سربراہی اجلاس کے لیے روانہ ہو جائیں گے۔

اسرائیلی صدر کے دفتر نے بتایا کہ صدر ٹرمپ کی انتھک کوششوں سے نہ صرف یرغمالیوں کی رہائی ممکن ہوئی بلکہ مشرق وسطیٰ میں امن کے لیے نئے اقدامات کی بنیاد رکھی گئی۔ یہ اعزاز انہیں آئندہ چند ماہ میں ایک خصوصی تقریب میں دیا جائے گا، تاہم آج باضابطہ طور پر اس فیصلے سے آگاہ کیا جائے گا۔

ذرائع کے مطابق امریکی ثالثی میں طے پانے والے 20 نکاتی امن منصوبے کے تحت غزہ میں دو سال سے جاری جنگ ختم، اسرائیلی فوج کی مرحلہ وار واپسی، قیدیوں کا تبادلہ اور غزہ کے لیے خودمختار انتظامی نظام کے قیام کا خاکہ پیش کیا گیا تھا۔ آج یرغمالیوں اور فلسطینی قیدیوں کے تبادلے کا پہلا مرحلہ مکمل ہو رہا ہے۔