معروف پاکستانی اداکار عزیر عباسی انتقال کر گئے

پاکستان ٹیلی ویژن کے سینئر اداکار عزیر عباسی کا انتقال ہو گیا، جس کی خبر نے ان کے مداحوں میں غم کی لہر دوڑا دی۔

عزیر عباسی نے طویل عرصے تک ڈرامہ انڈسٹری میں کام کیا اور متعدد یادگار کردار ادا کیے۔ انہیں ڈرامہ سیریل ’’انتقام‘‘ میں رشید بابا کے کردار سے خاص شہرت حاصل ہوئی، جسے ناظرین نے بے حد پسند کیا۔

ان کے دیگر معروف ڈراموں میں کراچی ڈویژن (2021)، باشو (2023)، ہیر رانجھا (2012) اور کھلونا شامل ہیں۔

عزیر عباسی کا تعلق ایک فنکار گھرانے سے تھا، ان کے بڑے بھائی زبیر عباسی معروف پروڈیوسر اور ڈائریکٹر ہیں، جبکہ وہ اداکار شمعون عباسی کے چچا بھی تھے۔

اداکار شمعون عباسی نے سوشل میڈیا پر اپنے چچا کے انتقال کی خبر شیئر کی اور گہرے دکھ کا اظہار کرتے ہوئے مداحوں سے ان کی مغفرت کے لیے دعا کی درخواست کی۔