ابوظہبی ٹی 10 لیگ 2025،محمد عامر کوئٹہ کیولری کے کپتان مقرر

محمد عامر کو ابوظہبی ٹی 10 لیگ 2025 میں کوئٹہ کیولری کا کپتان مقرر کر دیا گیا ہے۔

فرنچائز مینجمنٹ نے فاسٹ بولر محمد عامر پر بھرپور اعتماد کا اظہار کرتے ہوئے انہیں ٹیم کی قیادت سونپی ہے۔ محمد عامر پہلی بار ٹی 10 فارمیٹ میں کپتانی کے فرائض انجام دیں گے اور نوجوان کھلاڑیوں کی رہنمائی کریں گے۔

ٹیم انتظامیہ کا کہنا ہے کہ عامر کا تجربہ، جارحانہ بولنگ اسٹائل اور میدان میں جذبہ کوئٹہ کیولری کو مضبوط ٹیم بنانے میں مددگار ہوگا۔ محمد عامر نہ صرف نئی گیند سے خطرناک ہوں گے بلکہ بولرز کے لیے رہنمائی کا بھی اہم کردار ادا کریں گے۔

اس سال کوئٹہ کیولری نے متوازن اسکواڈ تشکیل دیا ہے جس میں سکندر رضا، عباس آفریدی، محمد وسیم جونیئر، عرفان خان نیازی، خزیمہ بن تنویر اور عرفات منہاس شامل ہیں۔

محمد عامر نے کہا کہ وہ ٹیم کو ایک فائٹنگ یونٹ کے طور پر میدان میں پیش کریں گے اور شائقین کو بہترین کرکٹ دیکھنے کو ملے گی۔ انہوں نے مزید کہا کہ ٹی 10 فارمیٹ تیز، دلچسپ اور فیصلہ کن ہوتا ہے اور وہ ٹیم کے ساتھ بھرپور محنت کریں گے۔

ابوظہبی ٹی 10 لیگ 18 نومبر سے شروع ہوگی جس میں دنیا کے نامور کرکٹرز ایکشن میں نظر آئیں گے اور شائقین کوئٹہ کیولری اور محمد عامر کی قیادت میں شاندار کرکٹ کی توقع رکھ سکتے ہیں۔