بھارتی جنگی طیاروں کی بھیانک تاریخ؛ 500 سے زائد حادثات

بھارتی فضائیہ کے جنگی طیاروں اور ہیلی کاپٹروں کی طویل تباہ کن تاریخ ایک بار پھر سامنے آ گئی ہے، جن  کے پچھلے 30 برس میں 500 سے زائد حادثات ہوئے اور200 سے زائد  پائلٹس ہلاک ہو چکے ہیں۔

بھارتی فوج کی ناقص منصوبہ بندی، تکنیکی خرابیوں، تربیت کے مسائل اور فضائی مشقوں کے دوران خطرناک غلطیوں کے باعث جنگی اثاثوں کا بھاری نقصان ہوتا رہا ہے۔ ماہرین کا کہنا ہے کہ بھارتی فضائیہ کے بیڑے میں شامل مختلف طیارے — خصوصاً MiG سیریز اور نیا مقامی طیارہ تیجس — پائلٹس کے لیے اُڑتے ہوئے تابوت ثابت ہو رہے ہیں۔

—

تیجس کے حادثات؛ کم وقت میں دوسری تباہی

بھارت کے مقامی طور پر تیار کردہ تیجس طیاروں کو کئی دہائیوں کی تحقیق اور بھاری اخراجات کے بعد گزشتہ برس فضائی بیڑے کا حصہ بنایا گیا۔ لیکن اس منصوبے کی ناکامی جلد سامنے آ گئی:

• 12 مارچ 2024: پہلا تیجس ریاست راجستھان میں تربیتی پرواز کے دوران گر کر تباہ ہوا، پائلٹ نے ایجیکشن کے ذریعے جان بچائی۔
• دبئی ایئر شو 2025: فضا میں کرتب دکھاتے ہوئے طیارے میں آگ بھڑک اُٹھی اور پائلٹ کو نکلنے کا موقع بھی نہ ملا۔ ونگ کمانڈر وکرم سنگھ حادثے میں جان سے گئے۔

صرف ایک سال کے اندر دو طیاروں کے حادثات نے بھارت کی دفاعی ٹیکنالوجی کے دعووں پر سنگین سوالات کھڑے کر دیے ہیں۔

—

MiG-21: بھارتی فضائیہ کی سب سے خطرناک تاریخ

MiG-21 کو بھارت میں سب سے زیادہ حادثات کا شکار طیارہ قرار دیا جاتا ہے:

• 468 سے زائد حادثات
• 200 سے زیادہ پائلٹس ہلاک

2002 میں جالندھر میں ایک MiG-21 طیارہ انجن فیل ہونے کے بعد رہائشی عمارت پر گر گیا، جس میں 8 افرادہلاک اور 17 زخمی ہوئے۔
اسی طرح 2018 میں کنگرا میں ایک اور طیارہ حادثے کا شکار ہوا جس میں پائلٹ مارا گیا۔

—

MiG-27: انجن اور ہائیڈرولک خرابیوں سے مسلسل تباہ

1985 میں شامل کئے گئے MiG-27 بھی بار بار حادثات کا شکار رہے:

• 2010 میں سیلیگوری میں حادثہ
• 2015 میں راجستھان کے قریب تباہ

صورتحال اتنی سنگین ہو گئی کہ 27 دسمبر 2019 کو MiG-27 کو بیڑے سے ریٹائر کر دیا گیا۔

—

MiG-29: حادثات کی طویل فہرست

1986 میں شامل ہونے والے MiG-29 کے بھی 25 سے زائد بڑے حادثات ہو چکے ہیں:

• 8 مئی 2020: جالندھر کے قریب حادثہ
• 2 ستمبر 2024: راجستھان میں تربیتی پرواز کے دوران حادثہ
• 4 نومبر 2024: آگرہ میں معمول کی پرواز کے دوران تباہ

پائلٹس زیادہ تر ایجیکٹ ہو کر جان بچاتے رہے، لیکن طیاروں کی تباہی کا سلسلہ برقرار رہا۔

—

مستقبل میں تیجس کے حوالے سے بھی خدشات

ماہرین کے مطابق جس طرح MiG طیاروں نے سلامتی کے شدید خطرات پیدا کیے، اسی طرح خدشہ ظاہر کیا جا رہا ہے کہ تیجس بھی مستقبل میں اسی خوفناک تاریخ کو دہرا سکتا ہے۔ بھارتی فوج کی ناقص تیاری، کمزور فضائی معیار اور طیارہ سازی کے غیر معیاری سسٹمز پائلٹس اور فضائی اثاثوں کو مستقل خطرے میں ڈالے ہوئے ہیں۔