امریکا برفانی طوفان کی لپیٹ میں، ہزاروں پروازیں منسوخ

 

امریکا کی کئی وسطی اور شمالی ریاستیں اس وقت شدید برفانی طوفان کی لپیٹ میں ہیں، جہاں دو فٹ سے زائد برف نے گھروں، عمارتوں اور سڑکوں کو ڈھانپ لیا ہے۔ مختلف ریاستوں میں برفباری اور سرد ہواؤں کا سلسلہ جاری ہے، جبکہ نیو یارک، الینوائے اور مشی گن میں ہر جانب سفیدی چھائی ہوئی ہے۔ الاسکا میں بھی شدید برفباری کے بعد درجہ حرارت نقطہ انجماد سے نیچے گر گیا ہے۔

خراب موسم کے باعث ملک بھر میں ہزاروں پروازیں منسوخ ہو چکی ہیں جبکہ متعدد تاخیر کا شکار ہیں۔ شکاگو شہر میں نومبر کے مہینے میں ریکارڈ برفباری ہوئی ہے، جہاں اوہیئر ائیرپورٹ پر 8.4 انچ برف ریکارڈ کی جا چکی ہے۔

امریکی محکمہ موسمیات نے پیشگوئی کی ہے کہ آئندہ دنوں میں بارشوں، یخ بستہ ہواؤں اور برفباری کے باعث سردی کی شدت مزید بڑھے گی۔ کینساس، نیبرسکا اور مشرقی ساحلی علاقوں سمیت کئی ریاستوں میں برفانی طوفان آنے کا امکان ہے۔ پینسلوینیا اور نیوجرسی میں بھی بھاری برفباری کی پیشگوئی کی گئی ہے، جہاں چھ انچ یا اس سے زائد برف پڑ سکتی ہے۔

ادھر برطانیہ میں بھی آئندہ ہفتے شدید برفباری کی وارننگ جاری کر دی گئی ہے۔ برطانوی میڈیا کے مطابق 9 اور 10 دسمبر کو انگلینڈ اور اسکاٹ لینڈ کے مختلف علاقوں میں برفباری کا امکان ہے۔