آئی ایل ٹی20 فائنل،نسیم شاہ اور کیرون پولارڈ کے درمیان لفظی جنگ

دبئی انٹرنیشنل کرکٹ اسٹیڈیم میں کھیلے گئے آئی ایل ٹی20 کے چوتھے ایڈیشن کے فائنل کے دوران ایک سنسنی خیز لمحہ اس وقت دیکھنے میں آیا جب ڈیزرٹ وائپرز کے فاسٹ بولر نسیم شاہ اور ایم آئی ایمریٹس کے کپتان کیرون پولارڈ کے درمیان لفظی جھڑپ ہو گئی۔

یہ واقعہ اننگز کے 11ویں اوور میں پیش آیا، جب پولارڈ نے گیند کو ڈیفنس کرتے ہوئے سیدھا نسیم شاہ کی جانب کھیلا۔ نسیم شاہ نے گیند اٹھاتے ہوئے مسکراتے ہوئے پولارڈ کی طرف دیکھا جس پر پولارڈ نے سخت ردعمل دیا۔ دونوں کھلاڑی ایک دوسرے کے قریب آئے اور تلخ جملوں کا تبادلہ ہونے لگا، تاہم امپائرز اور ڈیزرٹ وائپرز کے بیٹر جیسن رائے نے بروقت مداخلت کر کے معاملہ سنبھال لیا۔

نسیم شاہ نے بعد ازاں بولنگ میں شاندار جواب دیا اور 16ویں اوور کی پہلی گیند پر کیرون پولارڈ کو آؤٹ کر کے انہیں 28 رنز تک محدود کر دیا۔ یہ وکٹ ایم آئی ایمریٹس کے لیے بڑا دھچکا ثابت ہوئی۔

میچ میں ڈیزرٹ وائپرز نے ایم آئی ایمریٹس کو 46 رنز سے شکست دے کر اپنی تاریخ کا پہلا آئی ایل ٹی20 ٹائٹل اپنے نام کر لیا۔ وائپرز کی فتح میں نسیم شاہ کی عمدہ بولنگ اور کپتان سیم کرن کی ناقابلِ شکست نصف سنچری نے فیصلہ کن کردار ادا کیا۔

سیم کرن کی قیادت میں ڈیزرٹ وائپرز نے چار سیزنز میں تیسری بار فائنل تک رسائی حاصل کی اور اس مرتبہ ٹرافی جیتنے میں کامیاب رہے۔

میچ کے بعد نسیم شاہ نے کہا کہ فائنل کا دباؤ عام میچز سے بالکل مختلف ہوتا ہے اور یہ کامیابی پوری ٹیم کی مشترکہ محنت کا نتیجہ ہے۔ ان کے مطابق بیٹنگ، بولنگ، ٹیم ورک اور مینجمنٹ کے درست فیصلوں نے فتح میں اہم کردار ادا کیا۔

اس جیت کے ساتھ ڈیزرٹ وائپرز نے آئی ایل ٹی20 کی تاریخ میں پہلی بار چیمپئن بن کر اپنی مستقل مزاجی اور صلاحیت کا بھرپور مظاہرہ کیا۔