ایران کے جنگ ختم ہونے اور مزید حملوں کی دھمکی کے متضاد بیانات

امریکی صدر ڈونلڈ ٹرمپ نے ایران کو خبردار کیا ہے کہ آبنائے ہرمز سے رکاوٹ ختم نہ ہوئی تو موت، آگ اور قہر برسے گا۔ اس سے پہلے ٹرمپ نے کہا کہ ایران میں جنگ ختم ہونے والی ہے۔

ٹرمپ نے فلوریڈا میں ری پبلکن پارٹی کے اراکین کانگریس سے خطاب کیا، صحافیوں سے گفتگو کی جب کہ امریکی ٹی وی کو انٹرویو بھی دیا۔ اس دونوں انہوں نے بظاہر متضاد باتین کیں۔

فلوریڈا میں ٹرمپ نے کہا کہ اگر ایران نے ایسا کوئی اقدام کیا جس سے آبنائے ہرمز میں تیل کی ترسیل رک جائے، تو اسے انتہائی شدید کارروائی کا سامنا کرنا پڑا گا۔‘

انہوں نے کہا کہ ابتدا میں اندازہ لگایا گیا تھا کہ یہ جنگ 4 سے 5 ہفتوں تک جاری رہے گی، تاہم امریکا توقع سے کہیں تیزی سے اپنے اہداف کی جانب بڑھ رہا ہے اور جنگ اب اختتام کے قریب ہے۔
امریکی صدر نے دعویٰ کیا کہ ایران کے میزائل بڑی حد تک تباہ کر دیے گئے ہیں ، ڈرونز کو بھی مسلسل نشانہ بنایا جا رہا ہے اور ڈرون بنانے والی تنصیبات پر حملے کیے گئے ہیں۔ ان کے بقول فوجی طاقت کے اعتبار سے ایران کے پاس اب بہت کم وسائل باقی رہ گئے ہیں۔

دوسری جانب امریکا اور روس کے صدور کے درمیان ٹیلیفون پر رابطہ ہوا جس میں ایران کے خلاف جاری جنگ اور خطے کی صورتحال پر تبادلہ خیال کیا گیا۔

روسی صدارتی دفتر کے مطابق دونوں رہنماؤں نے خطے کی موجودہ صورتحال پر گفتگو کی۔

قبل ازیں امریکی صدر کا کہنا تھا کہ ایران کے تیل پر قبضہ کرنے کے بارے میں بات کرنا ابھی جلد بازی ہوگی، تاہم انہوں نے اس امکان کو خارج از امکان قرار نہیں دیا۔
ایک انٹرویو میں انہوں نے کہاکہ وہ اس وقت ایران کے تیل پر قبضے کے بارے میں گفتگو نہیں کرنا چاہتے۔ دریں اثنا امریکی اخبار وال سٹریٹ جنرل کے مطابق ٹرمپ کی طرف سے جنگ تقریباً ختم ہونے کے بیان پر تیل کی قیمتیں 90 ڈالر فی بیرل سے نیچے آ گئی ہیں۔

واضح رہے کہ گزشتہ روز ٹرمپ نے کہا تھا کہ تیل کی قیمتوں میں اضافہ عارضی ہے۔

قطر میں دھماکوں کے بعد عوام کو الرٹ جاری کیا گیا ہے، حکام نے دعویٰ کیا ہے کہ ایرانی میزائلز کو مار گرایا گیا

ادھر سعودی عرب میں شائبہ آئل فیلڈ کے قریب ڈرون کو تباہ کیا گیا، خرج میں دو بنگلادیشی ہلاک اور 12 زخمی۔