حماس نے محمد عودہ، اہلیہ اور دو بیٹوں کی شہادت کی تصدیق کردی
محمد عودہ نے حال ہی میں القسام بریگیڈز کی قیادت سنبھالی تھی۔ وہ اس سے قبل تنظیم کے مختلف عسکری اور انٹیلی جنس شعبوں سے وابستہ رہے تھے۔
حماس نے غزہ میں اپنے سینئر رہنما محمد عودہ کی شہادت کی تصدیق کر دی ہے۔ عرب میڈیا رپورٹس کے مطابق تنظیم کا کہنا ہے کہ اسرائیلی فضائی حملے میں محمد عودہ، ان کی اہلیہ اور دو بیٹے جاں بحق ہوئے۔
بیان کے مطابق حملہ غزہ سٹی کے علاقے رمل میں ایک رہائشی عمارت پر کیا گیا، جس کے نتیجے میں عمارت کی بالائی منزل شدید متاثر ہوئی۔ مقامی طبی ذرائع کا کہنا ہے کہ حملے میں دیگر شہری بھی متاثر ہوئے جبکہ متعدد افراد زخمی ہوئے۔
حماس کے مطابق محمد عودہ نے حال ہی میں القسام بریگیڈز کی قیادت سنبھالی تھی۔ وہ اس سے قبل تنظیم کے مختلف عسکری اور انٹیلی جنس شعبوں سے وابستہ رہے تھے۔
اسرائیلی حکام نے دعویٰ کیا ہے کہ محمد عودہ 7 اکتوبر 2023 کے حملوں کی منصوبہ بندی اور جنگ کے دوران مختلف کارروائیوں میں اہم کردار رکھتے تھے، تاہم ان دعوؤں کی آزاد ذرائع سے مکمل تصدیق سامنے نہیں آئی۔
محمد عودہ کی نماز جنازہ غزہ سٹی میں ادا کی گئی، جہاں ان کے اہلخانہ اور مقامی افراد کی بڑی تعداد شریک ہوئی۔ اہلخانہ کا کہنا تھا کہ فلسطینی عوام اپنی جدوجہد جاری رکھیں گے۔
رپورٹس کے مطابق غزہ میں جنگ بندی کے باوجود مختلف علاقوں میں کشیدگی اور حملوں کا سلسلہ جاری ہے، جس کے باعث انسانی صورتحال مزید پیچیدہ ہوتی جا رہی ہے۔