معاہدے کی دستخطی تقریب کا مقام تبدیل۔ اب برجن اسٹاک میں انعقاد

ایران اور امریکہ کے درمیان مفاہمتی یادداشت پر دستخط کی تقریب کے مقام میں تبدیلی کر دی گئی ہے، اور اب یہ تقریب جنیوا کے بجائے سوئٹزرلینڈ کے علاقے برجن اسٹاک میں 19 جون کو منعقد ہوگی۔
سوئس وزارت خارجہ کے مطابق برجن اسٹاک وسطی سوئٹزرلینڈ میں لوسرن کے قریب واقع ہے اور دشوار گزار جغرافیائی صورتحال کے باعث اسے سکیورٹی کے لحاظ سے زیادہ محفوظ مقام تصور کیا جاتا ہے۔
سوئس وزارت خارجہ نے بتایا کہ اس مقام کے انتخاب کی تجویز پاکستان اور قطر کے ثالثوں کے ساتھ ساتھ ایران اور امریکا کی جانب سے بھی دی گئی تھی، جس پر اتفاق رائے ہو گیا۔
ذرائع کے مطابق اس تاریخی امن معاہدے کی تقریب کی میزبانی پاکستان کرے گا، جس کے لیے وزیراعظم شہبازشریف جمعرات کو سوئٹزرلینڈ روانہ ہوں گے۔ ان کے ہمراہ نائب وزیراعظم اور دیگر وفاقی وزرا بھی وفد میں شامل ہوں گے۔
ذرائع کا یہ بھی کہنا ہے کہ ایرانی وفد کی قیادت پارلیمنٹ کے اسپیکر باقر قالیباف کریں گے، جبکہ امریکی قیادت کی سطح پر بھی اعلیٰ نمائندگی متوقع ہے۔ سابق امریکی صدر ڈونلڈ ٹرمپ بھی اس تقریب میں شرکت کا اشارہ دے چکے ہیں، جبکہ نائب صدر جے ڈی وینس کی شرکت کا امکان زیادہ ہے۔
قطری وزارت خارجہ کے مطابق قطر اس پورے ثالثی عمل کا حصہ رہا ہے اور معاہدے پر دستخط کی تقریب میں اس کی نمائندگی بھی موجود ہوگی۔ پاکستان، ایران، امریکہ اور دیگر علاقائی ممالک کے نمائندے بھی اس اہم تقریب میں شریک ہوں گے۔