غیر ملکی خاتون کا مجسٹریٹ کے سامنے اہم بیان منظرعام پر آگیا

لاہور میں غیر ملکی خواتین سے مبینہ زیادتی کے مقدمے میں متاثرہ غیر ملکی خاتون اسٹرڈ گیبریلا روبنسن کے مجسٹریٹ کے سامنے ریکارڈ کرائے گئے بیان کا کچھ حصہ منظرعام پر آگیا ہے۔

بیان کے مطابق خاتون نے بتایا کہ ان کی عمر 40 سال ہے اور وہ اسپین کے شہر ہنڈاس دی لاس کی رہائشی ہیں۔ انہوں نے حلف کے تحت بیان ریکارڈ کراتے ہوئے کہا کہ ان کے ساتھ پیش آنے والا واقعہ دوسری متاثرہ خاتون کے بیان سے ملتا جلتا ہے۔

انہوں نے الزام عائد کیا کہ قیام کے دوران مسلح افراد گھر میں داخل ہوئے، انہیں یرغمال بنایا، تشدد کا نشانہ بنایا اور رقم و دیگر سامان سے متعلق پوچھ گچھ کی۔ خاتون کے مطابق انہیں جان سے مارنے کی دھمکیاں بھی دی گئیں۔

متاثرہ خاتون نے مزید دعویٰ کیا کہ انہیں ایک کمرے میں لے جایا گیا جہاں ان پر جسمانی تشدد کیا گیا اور ان کے ساتھ زیادتی کی گئی۔ ان کے مطابق شور مچانے پر ملزم وہاں سے ہٹ گیا اور بعد ازاں انہیں دوبارہ دیگر افراد کے پاس لے جایا گیا۔

پولیس کی جانب سے مقدمے کی تفتیش جاری ہے، جبکہ خاتون کے بیان کو بھی شواہد کا حصہ بنا لیا گیا ہے۔