وزیراعظم کی آئی ایم ایف کو قائل کرنے میں کامیابی، پیٹرولیم مصنوعات پر سبسڈی ملنے کا امکان

وزیراعظم شہباز شریف نے کہا ہے کہ وہ نئے صوبوں سے متعلق بحث سے مکمل باخبر ہیں جبکہ بین الاقوامی مالیاتی فنڈ (آئی ایم ایف) کو منانے کے بعد جلد پیٹرولیم مصنوعات پر سبسڈی کے حوالے سے اہم پیشرفت ہوگی۔ نیویارک میں اقوام متحدہ کی جنرل اسمبلی کے اجلاس کے بعد امریکا سے لندن روانگی سے قبل وزیراعظم نے میڈیا سے خصوصی گفتگو کی۔ وزیراعظم نے بتایا کہ آئی ایم ایف کے مینیجنگ ڈائریکٹر کو منانے میں بڑی کامیابی ملی ہے، جس کے بعد عوام کو پیٹرولیم مصنوعات پر ریلیف دینے کی راہیں ہموار ہوں گی۔

دورہ امریکا کے دوران وزیراعظم شہباز شریف نے کئی اہم سائیڈ لائن ملاقاتیں کیں جن میں ایرانی صدر کے ساتھ ملاقات بھی شامل تھی۔ اس موقع پر ایرانی صدر نے پاکستان کی امن کے لیے کی جانے والی کاوشوں کو سراہا۔ وزیراعظم نے واضح کیا کہ پاکستان، سعودی عرب اور ترکیہ کے درمیان مکہ مشترکہ دفاعی معاہدہ کسی کے خلاف نہیں ہے اور اس پر عملدرآمد کے لیے پختہ عزم موجود ہے۔

علاوہ ازیں، اقوام متحدہ کی جنرل اسمبلی کے اجلاس میں اسرائیلی وزیراعظم کی تقریر کے دوران مختلف ممالک کے وفود نے احتجاجاً واک آؤٹ کیا۔ ذرائع کے مطابق وزیراعظم شہباز شریف اپنا 5 روزہ دورہ امریکا مکمل کرنے کے بعد لندن کے لوٹن ایئرپورٹ پہنچ گئے ہیں جہاں پاکستانی ہائی کمشنر ٹیپو عثمان نے ان کا استقبال کیا۔ وزیراعظم لندن میں 2 دن قیام کریں گے اور اس دوران اپنا طبی معائنہ کرائیں گے، جس کے بعد وہ وطن واپس روانہ ہوں گے۔