پاکستان کی بقا کے لیے چھوٹے صوبے ناگزیر ہیں، مصطفی کمال کا سخت بیان

اہم پریس کانفرنس، خون بہنے کی ذمہ داری بلاول پر ہوگی، ریفرنڈم کا مطالبہ۔

November 18, 2026 · قومی
پاکستان کی بقا کے لیے چھوٹے صوبے ناگزیر ہیں، مصطفی کمال کا سخت بیان

پاکستان کی بقا کے لیے چھوٹے صوبے ناگزیر ہیں، مصطفی کمال کا سخت بیان

وفاقی وزیر صحت مصطفی کمال نے کراچی میں ایک اہم پریس کانفرنس سے خطاب کرتے ہوئے کہا ہے کہ ملک کو بحرانوں سے نکالنے اور بچانے کے لیے نئے اور چھوٹے صوبے بنانا ناگزیر ہو چکا ہے۔ انہوں نے چیئرمین پاکستان پیپلز پارٹی بلاول بھٹو زرداری کے بیان پر شدید ردعمل کا اظہار کرتے ہوئے خبردار کیا کہ اگر سندھ میں خون کا ایک قطرہ بھی بہا تو اس کی تمام تر ذمہ داری بلاول بھٹو پر عائد ہوگی۔

مصطفی کمال کا کہنا تھا کہ بلاول بھٹو کو صوبائی تقسیم کی مخالفت کرنے اور خون خرابے کی باتیں کرنے کے بجائے اپنی جماعت کی 18 سالہ حکومتی کارکردگی کا حساب دینا چاہیے۔ انہوں نے الزام عائد کیا کہ سندھ کو گزشتہ 18 برسوں میں 22 ہزار ارب روپے کے فنڈز ملے لیکن زمینی حقائق اس کے برعکس ہیں جہاں بنیادی سہولیات کا فقدان ہے اور کراچی جیسے شہر میں عوام پینے کے پانی اور ادویات تک کو ترس رہے ہیں۔

وفاقی وزیر نے مزید کہا کہ صوبوں کی تشکیل کے اس حساس اور اہم معاملے پر عوامی ریفرنڈم ہی سب سے بہترین اور جمہوری راستہ ہے تاکہ عوام کی رائے کو حقیقی بالادستی حاصل ہو سکے۔ انہوں نے دوٹوک الفاظ میں کہا کہ ریاست کو اب فیصلہ کرنا ہوگا کہ اس نے کسی ایک سیاسی جماعت کو بچانا ہے یا پورے پاکستان کو مقدم رکھنا ہے۔