روس کے میزائل اور ڈرون حملے، یوکرین میں 8 افراد ہلاک

روس کی جانب سے یوکرین کے مختلف علاقوں میں میزائل اور ڈرون حملوں کے نتیجے میں کم از کم 8 افراد ہلاک جبکہ متعدد زخمی ہو گئے۔

یوکرینی حکام کے مطابق حملے دارالحکومت کیف سمیت کھارکیو، زاپوریزہیا اور سومی کے علاقوں میں کیے گئے، جن میں رہائشی اور دیگر تنصیبات کو نقصان پہنچا۔

رپورٹس کے مطابق کھارکیو کے مضافاتی علاقے میں ایک پوسٹل مرکز کو نشانہ بنایا گیا، جہاں کئی افراد ہلاک ہوئے، جبکہ کیف اور دیگر علاقوں میں بھی جانی نقصان کی اطلاعات سامنے آئیں۔

یوکرینی صدر ولادمیر زیلنسکی نے کیف پر ہونے والے حملوں کو شدید قرار دیتے ہوئے کہا کہ دارالحکومت کو بیلسٹک میزائلوں سے نشانہ بنایا گیا۔

یوکرین کی فضائیہ کے مطابق روس نے حملوں میں درجنوں میزائل اور بڑی تعداد میں ڈرونز استعمال کیے، جبکہ فضائی دفاعی نظام نے متعدد حملوں کو ناکام بنانے کا دعویٰ کیا ہے۔

دوسری جانب بحیرہ اسود میں ایک شہری کارگو جہاز کو بھی نشانہ بنائے جانے کی اطلاع ہے، جس میں عملے کے پانچ افراد ہلاک ہوئے۔