ایکس نے حوثی فوجی ترجمان یحییٰ سریع کا اکاؤنٹ معطل کردیا

سوشل میڈیا پلیٹ فارم ایکس نے یمن کے حوثی گروپ کے فوجی ترجمان یحییٰ سریع کا اکاؤنٹ معطل کردیا ہے۔

یحییٰ سریع کے ایکس اکاؤنٹ کو ایک لاکھ 21 ہزار سے زائد صارفین فالو کر رہے تھے۔ اکاؤنٹ پر اب ’Account Suspended‘ کا نوٹس ظاہر ہورہا ہے۔

اکاؤنٹ معطل کیے جانے کی فوری وجہ سامنے نہیں آسکی۔ ایکس کی جانب سے نوٹس میں کہا گیا ہے کہ پلیٹ فارم کے قواعد کی خلاف ورزی کرنے والے اکاؤنٹس کو معطل کیا جاسکتا ہے۔

یحییٰ سریع کا اکاؤنٹ حوثی گروپ کی جانب سے بحیرۂ احمر میں حملوں اور یمن کی صورتحال سے متعلق بیانات اور اعلانات جاری کرنے کے لیے استعمال ہوتا تھا۔

ان کے اکاؤنٹ پر سعودی عرب اور یمن کی بین الاقوامی طور پر تسلیم شدہ حکومت کے خلاف حوثی کارروائیوں سے متعلق بھی اعلانات اور معلومات شیئر کی جاتی رہی ہیں۔

اکاؤنٹ کی معطلی کے بعد اس اقدام کی وجوہات اور حوثی ترجمان کی جانب سے ممکنہ ردعمل کے حوالے سے مزید تفصیلات سامنے نہیں آسکیں۔