آبنائے ہرمز کھلنے کی امید، عالمی منڈی میں خام تیل کی قیمتیں 2 فیصد تک گر گئیں

عالمی مارکیٹ میں بدھ کے روز خام تیل کی قیمتوں میں تقریباً 2 فیصد کمی دیکھی گئی۔ قیمتوں میں کمی کی بڑی وجہ ایران اور عمان کے درمیان آبنائے ہرمز میں بحری آمدورفت سے متعلق مذاکرات دوبارہ شروع ہونے کی اطلاعات اور اس اہم آبی گزرگاہ کے دوبارہ کھلنے کی امید کو قرار دیا جا رہا ہے۔

رپورٹس کے مطابق برینٹ خام تیل کے مستقبل کے سودوں کی قیمت 1.78 ڈالر کمی کے بعد 86.80 ڈالر فی بیرل ہوگئی، جبکہ امریکی ویسٹ ٹیکساس انٹرمیڈیٹ (WTI) کی قیمت 1.49 ڈالر کم ہوکر 80.87 ڈالر فی بیرل پر آگئی۔ اس سے ایک روز قبل بھی دونوں اہم بینچ مارک میں 3 فیصد سے زیادہ کمی ریکارڈ کی گئی تھی۔

مارکیٹ ماہرین کے مطابق سرمایہ کار آبنائے ہرمز میں بحری آمدورفت سے متعلق ہونے والی پیش رفت پر گہری نظر رکھے ہوئے ہیں۔ ایران اور عمان کے درمیان مذاکرات میں پیش رفت کی توقع نے خام تیل کی قیمتوں پر دباؤ بڑھایا ہے۔

ایران اور عمان کے درمیان آبنائے ہرمز سے بحری جہازوں کی آمدورفت کو منظم کرنے کے حوالے سے کئی ہفتوں سے مذاکرات جاری ہیں۔ دونوں ممالک کی جانب سے بتایا گیا ہے کہ آبنائے ہرمز کے راستے بحری آمدورفت کے لیے ایک عارضی مشترکہ بحری راہداری پر بھی بات چیت ہوئی ہے، جبکہ آبی گزرگاہ کو ممکنہ بارودی سرنگوں سے صاف کرنے کے معاملے پر بھی پیش رفت ہوئی ہے۔

دوسری جانب امریکا نے مشرق وسطیٰ میں بعض سفارتی مشنز کے لیے عملے کی واپسی شروع کردی ہے۔ یہ سفارتی مراکز ایران کے ساتھ کشیدگی کے دوران خالی یا محدود کیے گئے تھے۔ بعض سفارت خانے ابتدائی طور پر محدود عملے کے ساتھ دوبارہ کام کریں گے۔

واشنگٹن نے ایران پر مزید اقتصادی پابندیاں بھی عائد کی ہیں، جن کا مقصد تہران کی آمدنی کے اہم ذرائع کو محدود کرنا ہے۔ امریکا نے ایران کے ساتھ کاروباری روابط برقرار رکھنے والے ممالک کو بھی ممکنہ کارروائی سے خبردار کیا ہے، تاہم فوری طور پر جرمانے عائد نہ کرنے کا اعلان کیا گیا ہے۔

ادھر آبنائے ہرمز کے داخلی راستے کے قریب ایک آئل ٹینکر کو نامعلوم سمت سے آنے والے پروجیکٹائل سے نقصان پہنچنے کی اطلاع بھی سامنے آئی ہے۔ برطانیہ کی میری ٹائم ٹریڈ آپریشنز کے مطابق واقعے کے بعد متاثرہ جہاز کو سفر روکنا پڑا۔

امریکی تیل ذخائر کے حوالے سے بھی مارکیٹ میں نئی معلومات سامنے آئی ہیں۔ امریکن پٹرولیم انسٹی ٹیوٹ کے اعداد و شمار کے مطابق 21 اگست کو ختم ہونے والے ہفتے میں امریکی خام تیل کے ذخائر میں تقریباً 42 لاکھ بیرل اضافہ ہوا، جبکہ ماہرین نے اس سے کہیں کم اضافے کی توقع ظاہر کی تھی۔

امریکی انرجی انفارمیشن ایڈمنسٹریشن کے سرکاری ذخائر کے اعداد و شمار بھی جاری کیے جانے ہیں، جنہیں عالمی تیل مارکیٹ میں طلب اور رسد کی صورتحال کے جائزے کے لیے اہم سمجھا جا رہا ہے۔