چیٹ جی پی ٹی اور کلاڈ سمیت معروف اے آئی ماڈلز کی سروسز بیک وقت معطل

دنیا بھر میں معروف مصنوعی ذہانت (AI) پلیٹ فارمز کی سروسز میں بیک وقت خلل پیدا ہونے سے لاکھوں صارفین کو مشکلات کا سامنا کرنا پڑا۔

رپورٹس کے مطابق OpenAI کے ChatGPT، Anthropic کے Claude اور xAI کے Grok سمیت متعدد معروف AI سروسز نے ایک ہی وقت میں تکنیکی مسائل کا سامنا کیا، جس کے باعث صارفین کو سروسز تک رسائی میں دشواری پیش آئی۔

انٹرنیٹ سروسز کی بندش اور تکنیکی خرابیوں پر نظر رکھنے والے پلیٹ فارم Downdetector کے مطابق ChatGPT، Claude اور Grok کے حوالے سے بڑی تعداد میں سروس متاثر ہونے کی رپورٹس موصول ہوئیں۔

ٹیکنالوجی ماہرین کے مطابق کسی ایک AI پلیٹ فارم کی عارضی بندش معمول کی بات ہوسکتی ہے، تاہم ایک ہی وقت میں کئی بڑے AI ماڈلز کا متاثر ہونا غیر معمولی صورتحال ہے۔

رپورٹس میں یہ بھی بتایا گیا ہے کہ Google Gemini کے حوالے سے بھی سروس میں خلل کی اطلاعات سامنے آئیں، تاہم گوگل کی جانب سے اس حوالے سے باضابطہ طور پر کسی بڑے سروس آؤٹیج کی تصدیق نہیں کی گئی۔

Anthropic کے سسٹم اسٹیٹس کے مطابق Claude کے بعض ماڈلز میں مسائل سامنے آئے، جبکہ کمپنی نے بتایا کہ دیگر ماڈلز کی کارکردگی معمول کی سطح پر واپس آ رہی ہے۔

دوسری جانب OpenAI کے سسٹم اسٹیٹس میں ChatGPT اور Codex کے حوالے سے بڑھتی ہوئی خرابیوں کی نشاندہی کی گئی، جبکہ xAI نے بھی Grok میں تکنیکی مشکلات کی تصدیق کرتے ہوئے مسئلے کے حل پر کام جاری رکھنے کا بتایا۔

صورتحال کو مزید اہم اس لیے قرار دیا جا رہا ہے کہ ان میں سے متعدد AI سروسز کے انفراسٹرکچر کا تعلق بڑے کلاؤڈ پلیٹ فارمز سے ہے۔ Microsoft Azure میں بھی اسی دوران سروس متاثر ہونے کی اطلاعات سامنے آئیں، جس کے باعث یہ امکان ظاہر کیا جا رہا ہے کہ بنیادی کلاؤڈ انفراسٹرکچر میں کسی خرابی نے متعدد AI سروسز کو بیک وقت متاثر کیا ہو۔

تاہم مختلف کمپنیوں کی جانب سے اس باہمی تعلق کی حتمی وجہ کی باضابطہ تصدیق سامنے نہیں آئی۔