وفاقی وزیر سرمایہ کاری قیصر شیخ کا استعفیٰ دینے پر غور کا اعتراف

وفاقی وزیر برائے سرمایہ کاری قیصر احمد شیخ نے پیر کے روز اے آر وائی نیوز کو دیے گئے ایک خصوصی انٹرویو میں انکشاف کیا ہے کہ انہوں نے ملک میں پھیلی ہوئی بدعنوانی اور اپنی تمام تر کوششوں کے باوجود کوئی خاطر خواہ ڈیلیور نہ کر پانے کی وجہ سے بارہا اپنے عہدے سے استعفیٰ دینے پر غور کیا ہے۔

قیصر احمد شیخ کا کہنا تھا کہ ملک میں حکومتیں بار بار تبدیل ہونے کے باوجود عام آدمی کی زندگیوں میں کوئی معنی خیز بہتری لانے میں ناکام رہی ہیں۔

انہوں نے مزید کہا کہ ملک میں بہت سی تبدیلیاں آ چکی ہیں لیکن مفادِ عامہ میں کچھ بھی نہیں بدلا، اس کے برعکس حالات زیادہ تکلیف دہ ہو چکے ہیں اور غربت کی شرح میں اضافہ ہو گیا ہے۔