مصنوعی ذہانت انسانوں کے بقا کیلئے خطرہ، اقوام متحدہ عہدے دار نے وارننگ دے دی

اقوام متحدہ کے انسانی حقوق کے سربراہ نے خبردار کیا ہے کہ آرٹیفیشل انٹیلیجنس (مصنوعی ذہانت) انسانیت کے لیے ایک “وجودی خطرہ” بن سکتی ہے، اور انہوں نے ان خطرات کو کم کرنے کے لیے فوری کارروائی کا مطالبہ کیا ہے۔

اقوام متحدہ کی انسانی حقوق کونسل کے سامنے خطاب کرتے ہوئے، وولکر ترک نے خبردار کیا کہ انسانوں کو اس وقت اپنے حقوق کے لیے اجنبی اور یہاں تک کہ بے مثال”خطرات کا سامنا ہے۔انہوں نے سوال کیاکہ اے آئی (AI) گورننس کی ضرورت کو بڑے پیمانے پر تسلیم کیا جاتا ہے، لیکن کارروائی کہاں ہے؟ انہوں نے خبردار کیا کہ تاخیر سے صرف بڑی ٹیک کمپنیوں، ان کے مالکان اور ان کے سہولت کاروں کو فائدہ پہنچتا ہے۔

ترک نے اس بات کی مذمت کی کہ مٹھی بھر افراد کے پاس اے آئی پر تقریباً لامحدود طاقت ہے، جس کے بارے میں ہمیں بار بار بتایا جاتا ہے کہ یہ ناقابل تصور کمپیوٹنگ صلاحیت رکھتی ہے۔انسانی حقوق کے سربراہ نے کہاکہ وہ آزادی کی بات کرتے ہیں، لیکن باریک بینی سے جائزہ لینے پر معلوم ہوتا ہے کہ یہ ہمارے ڈیٹا کا استحصال کرنے کی آزادی کے سوا کچھ نہیں ۔

ترک نے خاص طور پر خبردار کیا کہ ایسی اے آئی جو اپنے ٹیسٹنگ ماحول سے باہر نکل جائے یا ڈویلپرز کو بلیک میل کرے تاکہ اسے بند نہ کیا جا سکے، وہ اے آئی حد سے زیادہ طاقتور ہے۔

ان کا اشارہ بظاہر جولائی میں سامنے آنے والے ان انکشافات کی طرف تھا کہ اوپن اے آئی (OpenAI) کے ایجنٹس مبینہ طور پر کنٹرولڈ ماحول سے فرار ہو کر ہگنگ فیس (Hugging Face) کے سرورز میں داخل ہو گئے تھے، جو کہ پروگرامرز کے مابین اے آئی سافٹ ویئر شیئر کرنے کا ایک وسیع پیمانے پر استعمال ہونے والا پلیٹ فارم ہے۔اس واقعے نے ٹیک دنیا کو ہلا کر رکھ دیا اور اے آئی کی سخت ریگولیشن اور نگرانی کے مطالبات کو دوبارہ زندہ کر دیا۔

اینتھروپک، میٹااور دیگر کمپنیوں نے بھی ایجنٹس کی ٹیسٹنگ کے دوران اسی طرح کے واقعات کی اطلاع دی۔

ترک نے کہاکہ میں انڈسٹری کے اندرونی ذرائع کے ان خدشات سے اتفاق کرتا ہوں کہ جدید اے آئی انسانیت کے لیے ایک وجودی خطرہ بن سکتی ہے۔ اس سے پہلے کہ بہت دیر ہو جائے، اے آئی کی حفاظت اور سیکیورٹی کے ارد گرد پختہ ضمانتیں فراہم کرنے کے لیے ایک ہمہ گیر کوشش کی اپیل کر رہا ہوں۔

اقوام متحدہ کے انسانی حقوق سربراہ نے کہا کہ وہ آنے والے دنوں میں اے آئی کمپنیوں کو خط لکھیں گے تاکہ ان پر زور دیا جا سکے کہ وہ اب خطرات کو کم کرنے کے لیے وہ اقدامات کریں جو ان کے کنٹرول میں ہیں۔انہوں نے کہا کہ کم از کم،ہمیں اے آئی کی میزبانی کرنے والے ممالک اور اس کی سپلائی چینز میں شامل ممالک کو ایک ساتھ بیٹھ کر متفقہ ریڈ لائنز (حدود) طے کرنے کی ضرورت ہے۔
انہوں نے مزید کہاکہ ہمیں آزادانہ تصدیق، اور انڈسٹری کے اندر سیکیورٹی پر بہت زیادہ مضبوط تعاون کی ضرورت ہے۔ہمیں روزگار کے طریقوں، جمہوریت کے بنیادی اصولوں، اور ہمارے ماحول پر اے آئی کے انسانی حقوق پر پڑنے والے اثرات پر بھی غور کرنے کی ضرورت ہے۔