پٹرول 5روز میں21.88، ڈیزل 14.62روپے فی لیٹر مہنگا

لاہور: پاکستان میں پٹرولیم مصنوعات کی قیمتوں میں صرف پانچ روز کے دوران نمایاں اضافہ ریکارڈ کیا گیا ہے۔ 5 ستمبر سے 10 ستمبر 2026 تک پٹرول کی قیمت میں 21 روپے 88 پیسے جبکہ ہائی اسپیڈ ڈیزل کی قیمت میں 14 روپے 62 پیسے فی لیٹر اضافہ ہوا۔

10 ستمبر سے پٹرول کی نئی قیمت 367 روپے 75 پیسے فی لیٹر جبکہ ہائی اسپیڈ ڈیزل کی قیمت 392 روپے 67 پیسے فی لیٹر مقرر کی گئی ہے۔

اعداد و شمار کے مطابق 9 ستمبر کو پٹرول 364 روپے 35 پیسے اور ڈیزل 385 روپے 95 پیسے فی لیٹر تھا، جبکہ 8 ستمبر کو پٹرول کی قیمت 358 روپے 77 پیسے اور ڈیزل کی قیمت 381 روپے 77 پیسے فی لیٹر مقرر تھی۔

اس سے قبل 5 ستمبر کو پٹرول 345 روپے 87 پیسے اور ہائی اسپیڈ ڈیزل 378 روپے 5 پیسے فی لیٹر میں دستیاب تھا۔

دستیاب اعداد و شمار کے مطابق پٹرول کی فی لیٹر لاگت تقریباً 234 روپے 73 پیسے بنتی ہے، جبکہ صارفین سے اس وقت 367 روپے 75 پیسے وصول کیے جا رہے ہیں۔ یوں پٹرول کی قیمت میں لیوی، ٹیکس اور دیگر مارجنز کی مد میں نمایاں رقم شامل ہے۔

اسی طرح ہائی اسپیڈ ڈیزل کی قیمت میں بھی لیوی، ٹیکس اور مارجنز شامل ہیں۔ رپورٹ کے مطابق پٹرول پر مجموعی طور پر تقریباً 131 روپے 60 پیسے فی لیٹر جبکہ ڈیزل پر 122 روپے 55 پیسے فی لیٹر کی مد میں وصولیاں کی جا رہی ہیں۔

پٹرولیم مصنوعات کی قیمتوں میں حالیہ اضافے کی ایک بڑی وجہ عالمی مارکیٹ میں خام تیل کی قیمتوں میں تیزی کو قرار دیا جا رہا ہے۔ ایران اور امریکا کے درمیان بڑھتی کشیدگی، خلیجی خطے میں تیل بردار جہازوں سے متعلق واقعات اور یمن کے حوثیوں سے جڑے حملوں کے باعث عالمی توانائی مارکیٹ میں غیر یقینی صورتحال میں اضافہ ہوا ہے۔

رپورٹ کے مطابق عالمی مارکیٹ میں خام تیل کی قیمت 100 ڈالر فی بیرل کی سطح تک پہنچ گئی ہے، جس کے اثرات مختلف ممالک میں پٹرولیم مصنوعات کی قیمتوں پر بھی پڑ رہے ہیں۔

عالمی سطح پر تیل کی قیمتوں میں مزید اضافے کی صورت میں پاکستان میں بھی پٹرول اور ڈیزل کی قیمتوں پر دباؤ برقرار رہنے کا امکان ہے۔