ایران کا امریکی ڈرون مار گرانے کا دعویٰ

ایران اور امریکا کے درمیان کشیدگی ایک بار پھر شدت اختیار کر گئی ہے۔ پاسداران انقلاب نے دعویٰ کیا ہے کہ ایرانی فضائی دفاع نے آبنائے ہرمز کے قریب ایک امریکی ایم کیو ون ڈرون کو نشانہ بنا کر تباہ کردیا۔

ایرانی ذرائع کے مطابق پاسداران انقلاب کے فضائی دفاعی نظام نے امریکی ڈرون کی موجودگی کا سراغ لگایا، جس کے بعد اسے نشانہ بنایا گیا اور مار گرایا گیا۔

یہ دعویٰ ایسے وقت سامنے آیا ہے جب ایران اور امریکا کے درمیان پہلے ہی شدید کشیدگی جاری ہے اور آبنائے ہرمز کے اطراف فوجی اور بحری سرگرمیوں میں بھی اضافہ دیکھا جا رہا ہے۔

ایرانی حکام کی جانب سے امریکی ڈرون کو تباہ کرنے کے دعوے کی تاحال آزاد ذرائع سے تصدیق نہیں ہوسکی۔ اس لیے واقعے سے متعلق اطلاعات کو فی الحال ایرانی مؤقف کے طور پر ہی دیکھا جا رہا ہے۔