بلوچستان میں فورسز کی بروقت کارروائی،انسانی اسمگلنگ کی بڑی کوشش ناکام

کوئٹہ اور بلوچستان کے سرحدی علاقوں میں سیکیورٹی فورسز نے ایک کامیاب کارروائی کے دوران انسانی اسمگلنگ کی کوشش کو ناکام بناتے ہوئے خواتین اور بچوں سمیت 58 غیر قانونی مقیم افغان باشندوں کو حراست میں لے لیا ہے۔

سیکیورٹی ذرائع کے مطابق یہ کارروائی بلوچستان کے علاقے دشت میرانی میں عمل میں لائی گئی۔ گرفتار ہونے والے یہ تمام افغان باشندے پاکستان کے راستے غیر قانونی طور پر ایران اور پھر وہاں سے یورپ جانے کی کوشش کر رہے تھے، تاہم سیکیورٹی اداروں نے بروقت کارروائی کرکے ان کے عزائم خاک آلود کر دیے۔

متعلقہ ذرائع کا کہنا ہے کہ سرحدی علاقوں میں غیر قانونی نقل و حرکت کی روک تھام اور انسانی اسمگلنگ کے مکروہ دھندے کے خلاف سیکیورٹی فورسز کا مؤثر کارروائیوں کا سلسلہ مسلسل جاری ہے۔ حراست میں لیے گئے تمام افراد کو مزید قانونی کارروائی اور ضابطے کی کارروائی کے لیے متعلقہ پولیس حکام کے حوالے کر دیا گیا ہے جہاں ان سے مزید تفتیش کی جا رہی ہے۔