یمن میں سعودی فضائی حملہ، 6 افراد جاں بحق

یمن کے اہم ساحلی شہر موخا میں سعودی قیادت میں اتحاد کے مبینہ فضائی حملوں کے نتیجے میں کم از کم 6 افراد جاں بحق اور 8 زخمی ہونے کی اطلاعات سامنے آئی ہیں۔

حوثیوں سے وابستہ خبر رساں ادارے صبا کے مطابق حملوں میں جاں بحق ہونے والوں میں 2 بچے اور ایک خاتون بھی شامل ہیں، جبکہ زخمیوں میں بھی ایک بچہ اور ایک خاتون شامل بتائے گئے ہیں۔ تاہم ان ہلاکتوں اور زخمیوں سے متعلق تفصیلات کی آزاد ذرائع سے فوری طور پر تصدیق نہیں ہوسکی۔

یہ حملے ایسے وقت میں رپورٹ ہوئے ہیں جب یمن میں حوثی فورسز اور سعودی حمایت یافتہ حکومتی فورسز کے درمیان حالیہ دنوں میں کشیدگی اور جھڑپوں میں اضافہ دیکھا گیا ہے۔

رپورٹس کے مطابق حوثی فورسز نے بحیرۂ احمر سے متصل ساحلی علاقوں میں اپنی سرگرمیاں بڑھائی ہیں، جس کے بعد سعودی قیادت میں اتحاد کی جانب سے فضائی کارروائیوں میں بھی اضافہ ہوا ہے۔

دوسری جانب یمن کی گورننگ کونسل کے سربراہ رشاد العلیمی نے امریکی صدر ڈونلڈ ٹرمپ سے ٹیلی فون پر رابطہ کیا ہے۔ العلیمی کے دفتر کے ایک ذریعے کے مطابق انہوں نے حوثیوں کے خلاف امریکی حمایت کی درخواست کی، تاہم گفتگو کے دوران ٹرمپ کی جانب سے براہِ راست فوجی مدد کی یقین دہانی نہیں کرائی گئی۔

موخا اور بحیرۂ احمر کے دیگر ساحلی علاقے خطے میں تجارتی سرگرمیوں اور توانائی کی ترسیل کے حوالے سے اہم سمجھے جاتے ہیں۔ باب المندب کے اطراف جاری کشیدگی کے باعث بحری تجارت، جہاز رانی اور تیل کی ترسیل کے تحفظ سے متعلق خدشات بھی بڑھ گئے ہیں۔