مبارک زیب کے عزیزوں کے دھرنے پر پولیس کارروائی، متعدد مظاہرین گرفتار

باجوڑ میں رکن قومی اسمبلی مبارک زیب کے عزیزوں کی جانب سے جاری احتجاجی دھرنا پولیس کارروائی کے بعد دوسرے روز ختم ہوگیا، جبکہ پولیس نے احتجاج میں شریک متعدد افراد کو گرفتار کرلیا۔

مظاہرین کا کہنا تھا کہ انہوں نے مبارک زیب کی انتخابی کامیابی کے لیے جدوجہد کی اور مختلف قربانیاں دیں۔ ان کی جانب سے یہ الزام بھی عائد کیا گیا کہ مبارک زیب نے اپنا ووٹ 40 کروڑ روپے میں فروخت کیا اور اس رقم میں خاندان کا بھی حصہ بنتا ہے۔ اس الزام کی آزادانہ تصدیق نہیں ہوسکی۔

مظاہرین گزشتہ دو روز سے اپنے مطالبات کے حق میں دھرنا دیے ہوئے تھے اور ان کا کہنا تھا کہ مطالبات تسلیم ہونے تک احتجاج جاری رکھا جائے گا۔

پولیس نے دھرنا ختم کرانے کے لیے کارروائی کی، جس کے دوران احتجاج میں شریک متعدد افراد کو حراست میں لے کر جیل منتقل کیے جانے کی اطلاعات ہیں۔ مظاہرین کے مطابق گرفتار ہونے والوں میں بزرگ افراد بھی شامل ہیں۔

واضح رہے کہ اس سے قبل مبارک زیب کے خاندان کی جانب سے جرگے کے فیصلے پر عمل درآمد اور خاندان کے مالی حصے کی ادائیگی کا مطالبہ بھی سامنے آچکا ہے۔ خاندان کے ایک رکن نے ستمبر میں دعویٰ کیا تھا کہ جرگے نے خاندان کے لیے 3 کروڑ 20 لاکھ روپے کی ادائیگی کا فیصلہ کیا تھا۔

تاہم دھرنا ختم کرانے کی پولیس کارروائی، گرفتاریوں اور مبارک زیب پر عائد الزامات کے حوالے سے رکن قومی اسمبلی اور پولیس کا مؤقف تاحال سامنے نہیں آیا۔ نے آگئے