اسلام آباد میں 3 نئے ڈیم بنیں گے، دارالحکومت کی سکیورٹی اور انتظامی امور پر اہم اقدامات کا اعلان

وزیر مملکت برائے داخلہ طلال چوہدری نے اعلان کیا ہے کہ اسلام آباد میں پانی کی کمی کو دور کرنے کے لیے اگلے 3 سے 4 سال میں 3 نئے ڈیم تعمیر کیے جائیں گے۔ اسلام آباد میں ایک تقریب سے خطاب کرتے ہوئے انہوں نے کہا کہ ملک میں پانی کی 50 فیصد کمی ہے، تاہم وفاقی دارالحکومت کی ضروریات کو پورا کرنے کے لیے یہ اقدامات ناگزیر ہیں۔ انہوں نے کہا کہ شہر کے نظام کو بہتر بنانے کے لیے اسلام آباد کا اپنا نظام یہاں کے باسیوں کا حق ہے، اور اب تک 1100 ارب روپے کی زمین واگزار کروائی گئی ہے۔

وزیر مملکت کا کہنا تھا کہ اسلام آباد کا ایک ایک انچ کیمروں کی کوریج میں لایا جائے گا جبکہ اسلام آباد پولیس میں 10 ہزار نئے اہلکار بھرتی کیے جائیں گے۔ انہوں نے اس بات پر زور دیا کہ ووٹ کا استعمال ذات، برادری یا ظاہری صورت دیکھ کر نہیں بلکہ کارکردگی کی بنیاد پر کیا جانا چاہیے۔

دریں اثنا، ایک اور ٹی وی انٹرویو میں طلال چوہدری نے خبردار کیا کہ اگر اسلام آباد ہائیکورٹ کے احکامات کی خلاف ورزی کی گئی تو توہین عدالت کے پہلے ملزم وزیراعلیٰ خیبر پختونخوا ہوں گے۔ انہوں نے مزید کہا کہ حکومت مذاکرات سے کبھی پیچھے نہیں ہٹی، لیکن کسی کو این آر او نہیں دیا جائے گا۔

دوسری جانب، اسلام آباد چیمبر آف کامرس نے دارالحکومت کو صوبائی حیثیت دلانے کے لیے ایک بڑا کنونشن بلانے کا فیصلہ کیا ہے، جس میں اسلام آباد کے لیے الگ اسمبلی، منتخب حکومت اور وزیراعلیٰ کا مطالبہ کیا جائے گا۔ مجوزہ چارٹر کے مطابق اسمبلی اور یونین کونسلوں کے انتخابات 120 دن کے اندر کرانے اور سی ڈی اے کے امور کو محدود کرنے کی تجاویز بھی پیش کی جائیں گی۔