پاکستان، ترکیہ، آذربائیجان اور ازبکستان کی مشترکہ فوجی مشق مکمل

پاکستان، ترکیہ، آذربائیجان اور ازبکستان کی اسپیشل فورسز کی کثیر ملکی مشترکہ مشق ’’ایٹرنل برادرہُڈ-5‘‘ ازبکستان میں مکمل ہوگئی۔

مشق میں پاکستان سمیت مختلف ممالک کی اسپیشل فورسز نے حصہ لیا، جبکہ قازقستان نے مبصر ملک کی حیثیت سے شرکت کی۔ یہ مشق 13 سے 25 ستمبر 2026 تک جاری رہی۔

مشق کا بنیادی مقصد شریک ممالک کی اسپیشل فورسز کے درمیان تعاون، باہمی رابطہ کاری اور پیشہ ورانہ صلاحیتوں کو مزید بہتر بنانا تھا۔ اس دوران مختلف جدید آپریشنز، جنگی حکمت عملیوں اور سکیورٹی چیلنجز سے نمٹنے کے تجربات ایک دوسرے کے ساتھ شیئر کیے گئے۔

شرکت کرنے والی فورسز نے عملی سرگرمیوں کے ذریعے اپنی مہارتوں کا مظاہرہ کیا اور مختلف آپریشنل معاملات میں باہمی تجربات سے استفادہ کیا۔ مشق کے ذریعے جدید کارروائیوں کے حوالے سے رابطہ کاری اور پیشہ ورانہ تعاون کو فروغ دینے پر بھی توجہ دی گئی۔

حکام کے مطابق ایٹرنل برادرہُڈ-5 مشق شریک ممالک کے درمیان دفاعی و سکیورٹی تعاون، باہمی اعتماد اور فوجی روابط کے فروغ کی عکاسی کرتی ہے، جبکہ ایسی مشترکہ سرگرمیوں سے اسپیشل فورسز کی مشترکہ صلاحیتوں اور باہمی ہم آہنگی میں اضافہ ہوتا ہے۔