صدر زرداری اور وزیراعظم شہباز شریف کی ملاقات،حکومت و پیپلز پارٹی کا مشترکہ وفد کل پی ٹی آئی سے ملاقات کرے گا
اہم پیش رفت، ایوان صدر میں اعلیٰ سطح اجلاس، مذاکرات کا فیصلہ،
صدر مملکت آصف علی زرداری اور وزیراعظم شہباز شریف ایوان صدر میں اجلاس کی صدارت کر رہے ہیں۔
اسلام آباد میں صدر مملکت آصف علی زرداری اور وزیراعظم شہباز شریف کے درمیان ایوان صدر میں ایک اہم ملاقات ہوئی، جس میں ملک کی مجموعی سیاسی اور سیکیورٹی صورتحال پر تفصیلی تبادلہ خیال کیا گیا۔ اس اعلیٰ سطح اجلاس کے دوران خیبر پختونخوا کی سیکیورٹی صورتحال پر گہری تشویش کا اظہار کیا گیا اور ملکی سلامتی کا جائزہ لیا گیا۔
سرکاری اعلامیے کے مطابق اجلاس میں دہشت گردی کے خلاف قومی عزم کو مزید مضبوط بنانے اور ملک میں پائیدار امن و استحکام کے لیے تمام متعلقہ اداروں کے درمیان مؤثر تعاون کی ضرورت پر زور دیا گیا۔ اجلاس کے دوران یہ اہم فیصلہ کیا گیا کہ وفاقی حکومت اور پاکستان پیپلز پارٹی کا ایک مشترکہ وفد پاکستان تحریک انصاف (پی ٹی آئی) کی قیادت سے ملاقات کرے گا، جس میں موجودہ سیاسی صورتحال پر باضابطہ مذاکرات کیے جائیں گے۔
ایوان صدر کے جاری کردہ بیان کے مطابق پی ٹی آئی سے مذاکرات کے لیے تشکیل دیے گئے مشترکہ وفد میں وفاقی حکومت کی نمائندگی وزیر داخلہ محسن نقوی، وزیراعظم کے مشیر برائے سیاسی امور رانا ثناء اللہ اور امیر مقام کریں گے، جبکہ پاکستان پیپلز پارٹی کی جانب سے سینیٹر شیری رحمان، سید نوید قمر اور اعجاز جکھرانی وفد کا حصہ ہوں گے۔
ملاقات میں نائب وزیراعظم اور وزیر خارجہ سینیٹر محمد اسحاق ڈار، وفاقی وزیر قانون و انصاف سینیٹر اعظم نذیر تارڑ، اٹارنی جنرل منصور عثمان اعوان، وزیراعظم کے مشیر ڈاکٹر توقیر شاہ، سینیٹر سلیم مانڈوی والا، سندھ کے سینئر وزیر شرجیل انعام میمن اور صوبائی وزیر سید ناصر حسین شاہ بھی شریک تھے۔ اجلاس میں صوبائی صورتحال اور دیگر آئینی و قانونی امور پر بھی غور کیا گیا۔