وزیراعظم کی ایرانی وزیر خارجہ سے تعزیت، تہران کا امریکی اخراج کا دعویٰ مسترد

وزیراعظم محمد شہباز شریف نے ایرانی وزیر خارجہ عباس عراقچی سے ٹیلیفونک رابطہ کرتے ہوئے ان کی ہمشیرہ کے انتقال پر گہرے دکھ اور افسوس کا اظہار کیا ہے۔ وزیراعظم نے مرحومہ کی مغفرت اور بلندی درجات کے لیے دعا کی جبکہ سوگوار خاندان کے لیے صبر و استقامت کی بھی دعا کی۔ ایرانی وزیر خارجہ نے مشکل وقت میں ہمدردی اور تعزیت کا اظہار کرنے پر وزیراعظم پاکستان کا شکریہ ادا کیا۔

دوسری جانب اقوام متحدہ میں ایران کے مشن نے امریکی میڈیا کی اس رپورٹ کو سختی سے مسترد کر دیا ہے جس میں دعویٰ کیا گیا تھا کہ امریکی وزیر خارجہ مارکو روبِیو نے ایرانی وفد کو نیویارک چھوڑنے کا حکم دیا تھا۔ ایرانی مشن کے مطابق ایرانی وفد پیر کی شام اپنے پہلے سے طے شدہ شیڈول کے مطابق روانہ ہوا تھا جس سے امریکی محکمہ خارجہ کو 17 ستمبر کو ہی آگاہ کر دیا گیا تھا۔

بین الاقوامی خبر رساں اداروں کے مطابق نیویارک میں اقوام متحدہ کی جنرل اسمبلی کے اجلاس کے دوران ایرانی وزیر خارجہ عباس عراقچی نے یورپی اور مشرق وسطیٰ کے سفارت کاروں سے ملاقاتیں کیں جن میں تہران کی جانب سے ایک اہم تجویز پیش کی گئی۔ رپورٹ کے مطابق ایران نے پابندیوں میں نرمی کے بدلے بین الاقوامی جوہری معائنہ کاروں کو بمباری سے متاثرہ تنصیبات تک رسائی دینے کی پیشکش کی ہے۔

علاوہ ازیں، ایرانی وزیر خارجہ عباس عراقچی نے ایک نشریاتی ادارے کو دیے گئے انٹرویو میں واضح کیا کہ 60 فیصد یورینیم کی افزودگی قانونی ہے اور جوہری عدم پھیلاؤ کے معاہدے کے دائرہ کار میں آتی ہے۔ انہوں نے کہا کہ امریکا اگر نیک نیتی کا مظاہرہ کرے تو جوہری مسائل پر بات چیت کے لیے تیار ہیں، تاہم مذاکرات کی کامیابی کے لیے منجمد اثاثوں کی بحالی اور اقتصادی ناکہ بندی کا خاتمہ لازمی شرط ہے۔