ٹائمز ہائر ایجوکیشن رینکنگ میں 56 پاکستانی جامعات شامل، قائد اعظم یونیورسٹی سرفہرست

عالمی سطح پر یونیورسٹیوں کی کارکردگی اور درجہ بندی کی رپورٹس جاری کرنے والے برطانوی ادارے ’ٹائمز ہائر ایجوکیشن‘ نے ’ورلڈ یونیورسٹی رینکنگ 2027‘ جاری کر دی ہے۔ جاری رپورٹ کے مطابق پاکستان کی 56 جامعات کو اس عالمی رینکنگ میں شامل کیا گیا ہے، جو ملک میں تعلیمی معیار کے حوالے سے ایک اہم پیش رفت کو ظاہر کرتی ہے۔

رپورٹ کے مطابق قائد اعظم یونیورسٹی پاکستان کی بہترین جامعات میں سرفہرست قرار دی گئی ہے، اور اس کا عالمی رینکنگ میں 551 سے 600 کا بینڈ مقرر کیا گیا ہے۔ اس کے علاوہ نیشنل یونیورسٹی آف سائنسز اینڈ ٹیکنالوجی (نیسٹ) 601 سے 650 کے بینڈ، جب کہ کامسیٹس یونیورسٹی اسلام آباد 651 سے 700 کے عالمی رینکنگ بینڈ میں شامل کی گئی ہے۔ بہاؤالدین زکریا یونیورسٹی، یونیورسٹی آف ایگریکلچر فیصل آباد اور یونیورسٹی آف لاہور کو 701 سے 800 کے بینڈ میں رکھا گیا ہے۔

مزید برآں، ایئر یونیورسٹی، گومل یونیورسٹی، جی سی یونیورسٹی فیصل آباد، انٹرنیشنل اسلامک یونیورسٹی اسلام آباد اور جامعہ پنجاب سمیت متعدد جامعات 801 سے 1000 کے بینڈ میں شامل ہیں۔ لمز 1001 سے 1200، ڈاؤ یونیورسٹی آف ہیلتھ سائنسز اور جامعہ کراچی 1601 سے 1800 کے بینڈ میں آئی ہیں، جب کہ این ای ڈی یونیورسٹی 1801 سے 2000 کے بینڈ میں شامل ہے۔ نیشنل یونیورسٹی آف میڈیکل سائنسز (نمز) کو 2001 اور اس سے اوپر کے رینکنگ بینڈ میں رکھا گیا ہے۔

بین الاقوامی سطح پر آکسفورڈ یونیورسٹی مسلسل 11 ویں سال ریکارڈ طور پر پہلے نمبر پر براجمان ہے، تاہم اس نے میساچوسٹس انسٹی ٹیوٹ آف ٹیکنالوجی (ایم آئی ٹی) کو انتہائی معمولی فرق سے پیچھے چھوڑا۔ رپورٹ کے مطابق پہلی بار ایشیا براعظم یورپ سے آگے نکل گیا ہے اور ایشیا کی 3 جامعات نے سرفہرست 15 جامعات میں جگہ بنائی ہے۔

دریں اثنا، تعلیمی شعبے سے متعلق ایک اور پیش رفت میں خیبرپختونخوا کی 8 جامعات میں وائس چانسلرز کی تقرریاں کر دی گئی ہیں۔ جاری کردہ نوٹیفکیشن کے مطابق ڈاکٹر عبدالجلیل خان کو خیبر میڈیکل یونیورسٹی، ڈاکٹر محمد نسیم اللہ کو صوابی یونیورسٹی اور ڈاکٹر محمد عمران کو زرعی یونیورسٹی پشاور کا وائس چانسلر تعینات کیا گیا ہے۔ اسی طرح ڈاکٹر محمد حسن الامین سوات یونیورسٹی، پروفیسر ڈاکٹر انیلا انور شہید بینظیر بھٹو وومن یونیورسٹی، پروفیسر ڈاکٹر ادریس یونیورسٹی آف ملاکنڈ، ڈاکٹر ساجد راشید احمد یونیورسٹی آف ہری پور اور ڈاکٹر اقبال منیر کو شہید بینظیر وومن یونیورسٹی اپر دیر کا وائس چانسلر مقرر کیا گیا ہے۔ نوٹیفکیشن کے مطابق ان تقرریوں کی ابتدائی مدت 2 سال ہوگی، جبکہ مزید 2 سال کی توسیع ان کی کارکردگی سے مشروط ہوگی۔