پی آئی اے نے کراچی بیس کے لیے فضائی میزبانوں کی نئی بھرتیوں کا اعلان کر دیا

پاکستان انٹرنیشنل ایئرلائنز (پی آئی اے) نے کراچی بیس کے لیے فضائی میزبانوں (ایئر ہوسٹس اور کیبن کریو) کی نئی آسامیوں پر بھرتیوں کا باقاعدہ اعلان کر دیا ہے۔ جاری کردہ تفصیلات کے مطابق اس عمل کے تحت 20 سے 28 سال تک کے نوجوان درخواست دینے کے اہل ہوں گے۔

انتظامیہ کے مطابق امیدواروں کے لیے کم از کم تعلیمی قابلیت بیچلر ڈگری مقرر کی گئی ہے۔ خواہش مند افراد اپنی درخواستیں پی آئی اے کی آفیشل ویب سائٹ کے ذریعے آن لائن جمع کرا سکتے ہیں۔ آن لائن درخواستیں جمع کرانے کی آخری تاریخ 7 اکتوبر مقرر کی گئی ہے۔

پی آئی اے حکام کا کہنا ہے کہ کراچی بیس سے قبل ایئرلائن کی جانب سے لاہور اور اسلام آباد بیس کے لیے بھی فضائی میزبانوں کی بھرتیوں کا عمل شروع کیا جا چکا ہے۔ کراچی بیس کی یہ تازہ بھرتیاں ایئرلائن کے آپریشنز میں بہتری اور نئے عملے کی ضرورت کو پورا کرنے کے سلسلے کی کڑی ہیں۔