کراچی:انمول عرف پنکی کے خلاف مقدمے میں مزید گواہ طلب

کراچی: منشیات کی مبینہ خرید و فروخت کے مقدمے میں نامزد انمول عرف پنکی کے کیس میں اہم پیش رفت سامنے آئی ہے۔ ایڈیشنل ڈسٹرکٹ اینڈ سیشن عدالت میں سماعت کے دوران ویڈیو لنک کے ذریعے پیش ہونے والی ملزمہ کی چار گواہوں نے شناخت کی۔

عدالت میں گواہوں نے اپنے بیانات میں دعویٰ کیا کہ انمول عرف پنکی کو گارڈن کے علاقے سے گرفتار کیا گیا تھا۔ گواہوں میں لیڈی کانسٹیبل سونیا اشرف، تفتیشی افسر منصور، سب انسپکٹر عبدالستار اور اے ایس آئی اورنگزیب شامل تھے۔

سماعت کے دوران سرکاری وکیل شکیل عباسی نے مؤقف اختیار کیا کہ کاؤنٹر ٹیررازم ڈیپارٹمنٹ (سی ٹی ڈی) پولیس نے بھی ملزمہ کی شناخت کی ہے۔ ان کے مطابق ملزمہ کا کال ڈیٹا ریکارڈ (سی ڈی آر) مبینہ طور پر منشیات کے کاروبار سے وابستہ افراد کے ساتھ رابطوں کی نشاندہی کرتا ہے۔

پراسیکیوشن کی جانب سے ملزمہ کے مبینہ منشیات نیٹ ورک سے تعلق کے حوالے سے بھی دعوے کیے گئے، تاہم ان الزامات کا حتمی تعین عدالتی کارروائی کے بعد ہوگا۔

سماعت کے اختتام پر عدالت نے مقدمے میں مزید گواہوں کو آئندہ پیشی پر طلب کر لیا۔ کیس کی مزید سماعت آئندہ تاریخ پر ہوگی۔