خیبرپختونخوا حکومت کی پی ٹی آئی کارکنوں کی گرفتاری سے متعلق جعلی مراسلے کی تردید

پشاور: خیبرپختونخوا حکومت نے سوشل میڈیا پر گردش کرنے والے اس مبینہ مراسلے کو جعلی قرار دے دیا ہے جس میں پاکستان تحریک انصاف کے کارکنوں کی شناخت، تصدیق اور گرفتاری سے متعلق ہدایات درج تھیں۔

حکومت کے سرکاری سماجی رابطے کے کھاتے سے جاری بیان میں واضح کیا گیا ہے کہ محکمہ داخلہ خیبرپختونخوا نے پی ٹی آئی کارکنوں کی گرفتاری یا ان کی تفصیلات طلب کرنے کے حوالے سے کوئی ہدایات جاری نہیں کیں۔

محکمہ داخلہ خیبر پختونخوا سے منسوب پی ٹی آئی کارکنان کی گرفتاری اور ان کی تفصیلات طلب کرنے سے متعلق سوشل میڈیا پر گردش کرنے والا مبینہ مراسلہ جعلی ہے. عوام سے گزارش ہے کہ غیر مصدقہ اطلاعات آگے پھیلانے سے گریز کریں۔ خبروں کی تصدیق مستند سرکاری ذرائع سے کریں۔ pic.twitter.com/0Oq6uPIh80

— Government of KP (@GovernmentKP) October 14, 2026

بیان کے مطابق سوشل میڈیا پر پھیلائے جانے والے اس مراسلے کو جعلی قرار دیا گیا ہے۔ اس کے ساتھ جاری تصویر پر بھی واضح طور پر ’’جعلی‘‘ کی مہر لگائی گئی ہے۔

خیبرپختونخوا حکومت نے شہریوں سے اپیل کی ہے کہ وہ غیر مصدقہ اطلاعات کو آگے پھیلانے سے گریز کریں اور کسی بھی خبر یا سرکاری دستاویز کی تصدیق مستند سرکاری ذرائع سے کرنے کے بعد ہی اسے شیئر کریں۔