صدر مملکت اور وزیراعظم کا بصارت سے محروم افراد کے حقوق، خودمختاری اور معاشرتی شمولیت یقینی بنانے پر زور

اسلام آباد: صدر مملکت آصف علی زرداری اور وزیراعظم شہباز شریف نے سفید چھڑی کے عالمی دن کے موقع پر بصارت سے محروم افراد کے حقوق کے تحفظ، خودمختاری اور معاشرتی شمولیت کو یقینی بنانے کی ضرورت پر زور دیا ہے۔ دونوں رہنماؤں نے خصوصی افراد کے لیے مساوی مواقع پیدا کرنے اور عوامی مقامات تک رسائی آسان بنانے کے عزم کا اظہار کیا۔

وزیراعظم شہباز شریف نے اپنے پیغام میں بصارت سے محروم افراد کے عزم، حوصلے اور صلاحیتوں کو سراہتے ہوئے کہا کہ انہیں بااختیار بنانے اور معاشرے کا مؤثر حصہ بنانے میں اہلخانہ، معاونین اور متعلقہ اداروں کا کردار اہم ہے۔

وزیراعظم کا کہنا تھا کہ سفید چھڑی کا عالمی دن بصارت سے محروم افراد کی آزادی، خوداعتمادی اور باوقار زندگی کی اہمیت اجاگر کرتا ہے۔ سفید چھڑی انہیں روزمرہ سرگرمیوں میں زیادہ خودمختاری کے ساتھ حصہ لینے اور تعلیم، ملازمت سمیت زندگی کے مختلف شعبوں میں آگے بڑھنے میں مدد دیتی ہے۔

شہباز شریف نے پاکستانی سفارت کار صائمہ سلیم کی خدمات کو بھی قابلِ فخر قرار دیا، جو اقوام متحدہ کے عالمی سفارتی فورم پر پاکستان کی نمائندگی کر رہی ہیں۔ انہوں نے کہا کہ پاکستان کو اپنے باصلاحیت شہریوں کی کامیابیوں پر فخر ہے۔

دوسری جانب صدر مملکت آصف علی زرداری نے اپنے پیغام میں کہا کہ بصارت سے محروم افراد سمیت تمام خصوصی افراد کے لیے عوامی مقامات، سہولیات اور خدمات تک رسائی بہتر بنانا ضروری ہے۔ انہوں نے ان افراد کے حقوق اور تحفظ کے لیے کام کرنے والی تنظیموں کی کوششوں کو سراہا۔

صدر مملکت کے مطابق سفید چھڑی بصارت سے محروم افراد کی آزادانہ نقل و حرکت میں اہم کردار ادا کرتی ہے اور انہیں تعلیم، روزگار اور روزمرہ زندگی کی سرگرمیوں تک رسائی میں سہولت فراہم کرتی ہے۔

آصف علی زرداری نے خصوصی افراد کی بحالی اور فلاح و بہبود کے لیے حکومتی اقدامات کا ذکر کرتے ہوئے سندھ حکومت کے محکمہ برائے بااختیاری افراد (ڈی ای پی ڈی) کے قیام کو سراہا۔ ان کا کہنا تھا کہ دیگر صوبوں میں بھی ایسے ادارہ جاتی انتظامات خصوصی افراد کی ضروریات پوری کرنے اور انہیں معاشرے میں مؤثر کردار ادا کرنے کے قابل بنانے میں مدد دے سکتے ہیں۔

صدر مملکت اور وزیراعظم نے اپنے پیغامات میں اس عزم کا اعادہ کیا کہ بصارت سے محروم افراد سمیت تمام خصوصی افراد کو مساوی مواقع، محفوظ ماحول اور باوقار زندگی فراہم کرنے کے لیے مشترکہ کوششیں جاری رہنی چاہئیں۔